Press "Enter" to skip to content

Mih noh ka Kong Pelcy na ka President BJP ban kyrshan UDP ha Ranikor

Shillong, Naitung, 30: Ka Kong Pelcy Snaitang, kaba la shakri la saw snem kynthi kum ka President jong ka Mahila Morcha jong ka Bharatiya Janata Party (BJP) Meghalaya Pradesh, hynne ka lah sngi u Blei ka la phah ia ka shithi ban pynkut noh ia ka jingiadei bad kane ka Party.

Ha kane ka shithi iehnohkam ba la phah sha u President ka BJP, Meghalaya Pradesh, ka Kong Pelcy ka la pynpaw ba ka la iehnoh ia ka kam kum ka President jong ka Mahila Morcha Meghalaya bad kum ka dkhot jong ka BJP.

Haba pynpaw ia ka daw, ka Kong Pelcy ka la ong, “ma nga bad ki nongkyrshan jong nga ngi la duh ia ka jingshahniah ia u Bah Shibun Lyngdoh kum u State President.” Ka Kong Pelcy Snaitang ka dei ka kyrtong jong ka BJP ha ka elekshon MLA, 2018 na Ranikor Constituency.

Ka Kong Pelcy haba iakren bad u nongthoh khubor ka la ong, “ka jingpynlong ia nga ban hiar na ka shuki President bad kum ka dkhot ka BJP ka long hadien ka jingwan ka elekshon shiteng samoi ha Ranikor Constituency ngam don kano kano ka jingiasngewthuh jingmut naduh kaba sdang.”

“Ka la don ka jingiakren ba ka BJP kan ym pynieng kyrtong na Ranikor Constituency ha kane ka elekshon shiteng samoi, bad dalade ruh nga la pynbna ba ngan ym iakhun ia kane ka elekshon shiteng samoi namarba ha ka elekshon baladep watla nga la trei shitom ngam shym la poi sha ka thong bad nga iakhun biang kan shu long tang ka jingpynbun ia ki kyrtong ha ka Constituency.”

“Hynrei nga sah ha ka umdum pat ban iohi ia ka khubor kaba mih ha ka kotkhubor ha ka sngi saitjaiñ jong ka taiew baladep ba ka BJP ka la pynbna ban pynieng kyrtong ha ka elekshon shiteng samoi ha Ranikor Constituency,” ong ka Kong Pelcy bad bynrap, “kane ka long thik kum ka jingialehkai khyllung khynnah kat ia kane kambah kam san.”

“Hadien ba nga la iohi ha ki kot khubor ba ka BJP kan kyrshan ia ka NPP ha ka elekshon shiteng samoi, ha Ranikor, bun ki nongkyrshan jong ki la rai ban kyrshan noh ia kiwei ki kyrtong. Hynrei ym don wat tang uwei ruh na ki nongkyrshan jong nga kiba kwah ban kyrshan ia ka NPP,” ka la ong.

Ka la iathuh ruh ba ki nongkyrshan ki la pynpaw ia ka mon ba ki kham noh mynsiem ban ai jingkyrshan ia u Bah Pius Marweiñ, u kyrtong ka UDP. “Wat ialade ruh nga la rai ban ai jingkyrshan ia u kyrtong ka UDP ha kane ka kynti,” la bynrap ka Kong Pelcy.

Haba kylli, ka la pynpaw ba ia mynta hi kam pat don jingmut ban leit pyniasoh sha kano kano ka seng saiñpyrthei hynrei ka la ong ba ia mynta hi kan ai jingkyrshan pura ia u kyrtong ka UDP.