Press "Enter" to skip to content

Da ki jingïaid paidbah bad sam dustbin pynshlur ka CEWS ïa ka jingkhuid

Ha ka jingrakhe ïa ka Swachhta Pakhwada
Nongpoh, Nailar 01: Ka Care Educational and Welfare Society kala rakhe ïaka Skill se Smapurn Swachhta Campaign “Swachhta Pakhwada” naduh ka 16 tarik Naitung haduh 1 tarik Nailar kaba dei ruh ka prokram halor ka khuid ka suba bala wanrah daka Ministry of Skill Development and Entrepreneurship kum shibynta ban kynjoh shaka thong ban wanrah ïaka khuid ka suba kumba la angnud da u Myntri Rangbah ka Ri.
Ïa ka katei ka prokram la sdang ruh da ka jingïabam smai ban wanrah ïaka khuid ka suba bad ruh ban pynlong ïaka imlang ka sahlang bad ki rud ki kiar kiba lait naka jing jaboh bala shim bynta shitrhem ruh da ki samla pule jong ka Mahatma Gandhi University, ki nonghikai, ki Rangbah Shnong ryngkat ki paidbah nongshong shnong jong 8 tylli ki shnong ka thaiñ Byrnihat.
Na ka liang ka CEWS kala pynlong ruh shibun ki prokram naduh ka jingthung dieng, ka jingïaid paidbah ryngkat ki prokram ai jinghikai ban pynphriang ïaka khubor halor ka jingdonkam ka khuid ka suba ba ki paidbah ki dei ban bud ryntih naka bynta ka jingkoit jingkhiah bad ka jingitynnad.
Ym tang ba ka CEWS kala pynlong ïa kitei ki prokram halor ka khuid ka suba hynrei kala sam ruh da ki jaka bret ñiut (Dustbin) bad ki pla thep jaboh sha ki nong shong shnong ka shnong Pilangkata kum ka jingpynshlur bad ai mynsiem ïaki paidbah nong shong shnong bad naduh ki hep barit haduh ki samla bad tymmen ba ki shimkhia ban pynlong ïaki shnong ki thaw kiba khuid ba suba bad lait naki jingjaboh kiba lah ban wanrah shibun ki jingpang bad ktah ïaka koit ka khiah jong ki paidbah ba bun ba lang.
Katei ka prokram kala long ruh kaba jop bad seisoh da ka jingïa shimbynta shitrhem jong ki paidbah nongshong shnong naduh ki Rangbah Shnong ha katei ka thaiñ ryngkat ki samla pule bad ki nonghikai ka MGU.