Press "Enter" to skip to content

Kwah u CEM ka JHADC ban kham pynshai ka KHADC halor ka Lineage Bill

Shillong, Nailar, 05: U Ma Madonbai Rymbai, Chief Executive Member ka Jaiñtia Hills Autonomous District Council (JHADC) u la kynthoh ba ka Khasi Hills Autonomous District Council (KHADC) ka la mynjur ïa ka Khasi Hill Autonomous District (Khasi Social Custom of Lineage) (Second Amendment), Bill 2018, kam pat long kaba shai haduh katta katta ba uba bun balang un lah ban peiphang.
Ka Khasi Hills Autonomous District Council (KHADC) ka la mynjur ïa ka Khasi Hill Autonomous District (Khasi Social Custom of Lineage) (Second Amendment), Bill 2018, ha ka Dorbar Lyiur ha ka 25 tarik u Naitung, hynrei kumba lah ban sngewthuh kane ka Bill kam pat lah ban pynshai sha u paidbah ba bun balang.
Halor kane ka Bill, ka KHADC ka la mynjur ïa ka Section 3 jong ka Principal Act. Hadien ka Section 3 (c) ba la don lypa, ka sub-section 3 (d) la sa bsut da ka kyntien kaba ong, “kano kano ka kynthei Khasi kaba ïashong kurim bad u bym dei u Khasi bad kumjuh ki khun yn shim ba kim dei shuh ki Khasi bad kin duh ruh ïa ka hok longtrai Khasi bad kim lah ban kam ba ki dei ki Khasi hapoh kano kano ka aiñ.”
“Ki nongshong shnong kiba don ha ka Bri u Hynñiewtrep Hynñiewskum ki kynthup ïa ki Khynriam (Khasi) , ki Pnar, ki Bhoi, ki War bad ki dei ki juh. Ka Bill ka khlem kdew ïa kine kiwei pat bad ki Pnar ha ka Scheduled Tribe la thoh ‘Pnar’ bad kiba dei na War ruh la thoh Pnar ,” ong u Ma Madonbai bad bynrap, “lada ka Bill ka kdew kumto ka mut ki jaidbynriew Pnar kim long shuh mo ban ïashong kurim bad ki jaitbynriew Khasi?”
“Nga ïohi ba kane ka aiñ ka long kumta bad kam biang watla na ka liang ka Jaiñtia Hills Autonomous District Council ka don ka jingthmu ban pyntreikam ïa ka aiñ kaba kum kane ban ïada ïa ka jingshongkha khleh bad ki bym dei ki riewlum bad ki bym dei na ka Bri u Hynñiewtrep Hynñiewskum,” la bynrap une u CEM ka JHADC.
“Kumno ka Bill ka kdew tang ïa ki kynthei bad ladei ban leh bniah khnang ba kan ym don ka jinglah shiliang lada ka long aiñ. Ka Bill ka la bakla bad la shu rai kyrkieh. Nga kwah ba ka Bill kan long aiñ hynrei ki don ki jingduna bad na ka liang ka Executive Committee ka JHADC ngi la don jingthmu ban shna ïa kaba kum kane ka Bill,” la ong u Ma Madonbai.
“Ngi don ka jingpyrkhat na ka bynta ka shong shngaiñ jong ka jaidbynriew ha ka lashai bad ka ban sa wan. Kumta ka Bill ka ladei ban kdew ïa ki Sub-Tribe (Pnar, War, Bhoi bad kiwei) bad ym ban thoh tang ‘Khasi’ khnang ba kan ym wanrah jingeh bad ki jingkulmar hadien habud,” ong shuh shuh u Ma Madonbai bad kdew ruh ba ka Bri u Hynñiewtrep Hynñiewskum ka kdup ïa ki Khynriam, ki Pnar, ki Bhoi, ki War.
Kum ban shu kdew, tang hadien ba ka KHADc ka la mynjur ïa kane ka Bill, ki la mih ki kynhun kiba pyrshah ïa kane ka Bill bad kiba la pynher ruh da ki jingthoh sha u Ganga Prasad, Lat ka jylla ba un nym ai jingmynjur ïa kane ka Bill ba kan long aiñ. Kumjuh ruh ki la mih ki kynhun kiba kyrshan tylli tyllan ïa kane ka Bill bad kiba la phah jingthoh sha u Lat ban shon muhor noh kloi khnang ba kan long aiñ ka ban teh pyrkhing ïa ka jingsynjor ïa ka shongkha shongman hapdeng ka jaidbynriew Khasi.
Ka kynhun Saiñdur, Tipkur Tipkha, Ieng, Ehrngiew, Khun Hynñiewtrep (STIEH) kan sa hiar sha nongbah Jowai mynta ka lah sngi u Blei ban ïakynduh ïa u Ma Madonbai Rymbai, CEM ka JHADC ban ïakren sani halor ka jingdonkam jong ka rilum Jaiñtia ïa kane kajuh Bill khnang ban tehlakam ïa ka jingsynjor ka shongkha shongman.
Katkum ka jingïoh lum jingtip na ki thymmei khubor kiba ïajan ki ïathuh ba u Lat ka jylla ha ka miet sngi thohdieng jong ka taiew ba la pynphai biang ïa kane ka Bills sha ka tnad District Council Affairs (DCA) ka Sorkar Jylla ba kan bishar bniah biang ïa kane ka Bill.