Press "Enter" to skip to content

Kyndit ki Myntri Hima Mylliem ba shah pynhiar khet u Acting Syiem

Shillong, Nailar 05: Ki Myntri ka ka Hima Mylliem ki la pynpaw ïa ka jingsngewkyndit haduh katlah katiai ba ka Executive Committee bathymmai jong ka KHADC hapoh ka jingïalam u Bah Hispreaching Son Shylla kum u Chief Executive Member (CEM) ka la pynhiar khet ïa u Pa’iem Ricky Nelson Syiem, Acting Syiem khlem kano kano ka daw kaba sngew shongnia bad thung bujli da uwei pat.
Katkum ka jingwad jingtip da u nongthoh khubor, la ong ruh ba ha kaba ïadei bad ka jingai Patta ïa ka jaka ha Laitkor Nongdaneng ha kaba u Bah HS Shylla u ladep khot ïa ka jingïalang ha iing shnong ha ka 27 tarik jong u bnai baladep ha kaba la ïadon lang ruh u EM ka tnad Ilaka u Bah James Sylliang, u Paiem Ricky Nelson Syiem, ki Myntri bad na ka kur Mylliempdah.
Hadien ba la ïohsngew ïa ka jingïapynshai na baroh arliang, u CEM u la bthah ïa u Acting Syiem ban pynbeit biang ïa kane ka kam.
Ha kaba ïadei bad ka jingailad ban pynïaid ïa ka dukan sha u bar jylla u Muhammud Riaz, ladep pynbeit ïa kane ka kam bad ailad biang ban pynïaid da u Bah Donbok Mylliem Umlong.
Ha kaba ïadei bad ka jingshah pynhiar khet noh u Acting Syiem, ka KHADC ka la shu leh jyndat khlem da khot ïakren bad u lem bad ïa ka Dorbar jong ka Hima.