Press "Enter" to skip to content

Kyrshan ka HSPDP ïa ka UDP ha Ranikor

Shillong, Nailar 05 : Ka HSPDP ka la pynpaw ba kan kyrshan borbah ïa u kyrtong ka UDP, Bah Pius Marweiñ ha kane ka by-election khnang ba un ïoh ïa ka jingjop ba donburom.
Haba kren bad u Chief Organiser jong ka HSPDP, Bah Samlin Malngiang dang shen, u la ong ba kum ka party hi kin ïai bteng ban burom ïa ka soskular treilang kaba ki la don ha ka elekshon ba la dep khnang ba u kyrtong monlang jong kitei ki ar party un poi sha ka thong.
U Bah Samlin MLA ka HSPDP na Sohiong bad Myntri ka tnad PHE jong ka sorkar jylla u la ïathuh ba katei ka sienjam ka long ban burom ïa ka rai trei lang hapdeng jong ki, khamtam haba ha ka sorkar ruh ki trei lang kum ka kynhun.
Katkum ka jingïathuh jong u, ka HSPDP ruh ka don ka bynta kaba khraw ha Ranikor namar u MDC na katei ka thaiñ, Bah Mansturdy Nongrem ruh u don bad ka HSPDP mynta.
“Ngin kyrshan borbah bad don bynta lang ban pynjop donburom ïa u kyrtong ka UDP,” bynrap biang utei u Chief Organiser jong ka HSPDP.
Lah ban kdew hangne ba u kyrtong ka UDP un hap ban ïakhun pyrshah ïa u MLA barim ka Congress, Bah MM Danggo uba la hiar shuki dangshen bad mynta u pynkhreh pat ban ïa khun na ka tiket NPP, ha ka elekshon kaban long ha ka 23tarik mynta u bnai.
Kumba long haduh mynta, ka UDP ka don 7 ngut ki MLA kynthup lang ïa u Bah SK Sunn uba wan ban kyrshan lang ïa katei ka party. Katba ka HSPDP kaba treilang ha kawei ka kynhun bad ka UDP ha ka sorkar, ka don arngut ki MLA.