Press "Enter" to skip to content

La pynlong ïa ka ‘Ist BAYSWO Inter School Quiz’ ha Byrnihat

Shillong, Nailar :Ka Byrnihat Area Youth And Social Welfare Organisation, kala pynlong ïa ka “Ist BAYSWO Inter Quiz Competition,” hapoh ka auditorium Byrnihat proper ha ka 27.07.2018, ha kaba la wan iashim bynta da kiba buntylli ki skul jong ka thain Byrnihat, kiba kynthup ïa ka Charity Educare Sec.School kaba la ïoh ruh ban rah ïa ka khusnam kaba nyngkong bad ka Don Bosco HSS kaba la wan ba ar.
Kiwei pat ki skul kiba la wan ïashim bynta ki kynthup ïa ka Mt Zion Sec School, ka St. Jude Sec School, ka Nongrim Pres.SS bad kiwei kiwei.ïa ka prokram ha katei ka sngi la pynïaid da u chairman uba dei ruh u president jong ka seng BAYSWO u samla Ricky Lapang.
Haba aijingkren kum u Kongsan ha ka jingïalang u Rangbah Shnong ka Byrnihat Proper u Bah Jestlin Syngkli ula ai ka jingïaroh ïa ki samla jong ka seng kiba la lah ban pynlong kum ïa kane ka prokram na ka bynta ki khynnah skul hapoh kane ka shnong namar ba kam pat ju don mynno mynno ruh.Ha kajuh ka por ula ai mynsiem ïa ki samla jong ka Seng ba kin ïatrei shitrhem na ka bynta ka bha ka miat bad ka roi ka par ha ki sngi ki por ki ban dang wan.
Na ka liang u Symbud Kongsan u Bah William Mynsong uba dei u Dy CEM barim ha ka jingkren ula ai mynsiem ruh ïa ki khynnah skul kiba la wan ïashim bynta ha katei ka jingïakop ba kin long kiba trei shitom khnang ba kin lah ban kiew shaphrang ha ki jingpule ki jong ki.
Kiwei pat kiba la aijingkren ha katei ka sngi ki kynthup ïa u Ajit Makri Genl Secy jong ka seng uba la kdew ïa shibun ki kam kiba ka seng ka don ban leh na ka bynta ban rah ïa ka jingnang jingtip jong ki khynnah skul jong kane ka thain Byrnihat.Ula kdew ruh ba dang bun ki jingduna ia kiba dang dei ban leh na ka bynta ka bha ka miat hapoh ka imlang ka sahlang, kata kum ka jaka leit bar paidbah (public latrine), ka umbam um dih namar ka um kaba ki ïoh mynta ruh kam da long kaba biang ban dih, ka bording elektrik bad kiwei kiwei.
Halor kine ki jingbym bit bym biang na ka liang ka seng kala ong ba kan ïatreilang ryngkat ryngkat bad ki bor shnong jong ka thaiñ.Utei u nongïalam ka seng ula ong ruh ba la pynlong urban area ïa kane ka thaiñ tang ka nam namar kam pat shym la don kano kano ka jingkylla ha ka liang ka roi ka par.Kane ka long katkum u kyrwoh lyngba u President ka Seng.