Press "Enter" to skip to content

Lum ka Seng Khasi Kmie ïa ki tnat sor bad khap sor

Shillong, Nailar 5: Kum shi bynta ban pynkhlaiñ bad ban saiñdur ïa ka rukom treikam kiba janai bad ba ryntih shriak, ka Seng Khasi Kmie mynta ka sngi ka 5 tarik u Nailar 2018, ka la shim ïa ka sienjam kaba nymgkong ban lum ïa ka jingïalang jong ki dkhot nongkit kam jong ki tnat Seng Khasi ba dei nangne napoh sor bad khap sor Shillong.
Ïa kane ka jingïalang la pynlong ïa ka ha Seng Khasi College, Jaiaw, ïa kaba la wan ban ïashim bynta da ki nongïalam bad ki dkhot jong ka Seng Khasi Mawlai, Seng Khasi Nongthymmai-Madanryting Pyllun, Seng Khasi Pynthorumkhrah, Seng Khasi Nongmynsong, Seng Khasi Malki, Seng Khasi Laitkor, Seng Khasi Upper Shillong, Seng Khasi Ri Raid Laban bad Seng Khasi Seiñ Raij Mawprem.
Ïa kane ka jingïalang la sdang da ka nguh ka dem ka dwai ka phirat kaba la pyndep da u Rgh Donbokstar Kurkalang dkhot ka Kynhun u Tymmen U San ka Seng Khasi Kmie katba ïa ka jingïalang baroh kawei la pynïaid da u Rgh Païa B. Synrem ba dei artad u Asst. Secretary ka Seng Khasi Kmie.
Hadien ba la dep ka nguh ka dem, u President u Rgh D. K Dkhar u la ieng naka bynta ba un pynsngew bad ruh ban maitphang ïa ka jingthmu jong ka Seng Khasi Kmie halor ka jingkhot kaba kyrpang ka jong ka ïa kane ka jingïalang, ha kaba u la ieng ba un pynpaw ïa ka jingdonkam ban wanrah ïa ki jingkylla haba ïadei bad ka rukom treikam kiba ïadei noh kat kum kane ka juk kaba mynta.
Hadien kane la ioh ïa ka jingpynshai na u General Secretary ka Seng Khasi Kmie, u Rgh P.D Nongrum, uba la pynsngew ha kane ka jingïalang ïa kaei kaba ka Seng Khasi Kmie ka thmu ba kan leh noh nangne shakhmat, khamtam lei lei haba ïadei bad ka jingithuh ithaw bad baroh ki tnat Seng kiba don ha kylleng sawdong ka bri u Hynñiewtrep u Hynñiewskum.
“Hadien ba la dep ban pynthymmai ïa ka Jylli Pyrkhat Kam (JPK) ka Seng Khasi Kmie ha u bnai Jylliew mynta ka snem, kawei na ki kam kiba kum ka Seng Khasi Kmie ka sngew donkam ka long ba kan don noh ka rukom ïatrei kam kaba ïajan hapdeng jong ka bad phi baroh ki tnat Seng Khasi, ha kaba nga da sngewkmen ba mynta ka sngi maphi baroh ki nongïalam jong ki tnat ka Seng Khasi sor bad khap sor phi la ïashim khia ban wan sha kane ka jingïalang, ngi da sngew ioh mynsiem haka juh ka por nga ieng ba ngan tyrwa hangne ba hadien ba la dep kane ka jingïalang, ngi sa khreh ba ngin ïa hiar lang ryngkat sha ki Circle jong ki tnat Seng Khasi Bri Hynñiewtrep ban pynsngewthuh lem sha ki ïa ka jingdonkam ban ïa long tylli kawei khnang ban lah ban kynjoh sha katta ka thong kiba long kat kum ki tynrai ka niam Khasi” la pynpaw u bah Nongrum.
Ha kane ka jingïalang ka la don ruh ka jingpynithuh ïa ki dkhot nongkit kam ka JPK ka Seng Khasi Kmie bad ruh ïa ki dkhot nongkit kam jong ki tnat Sen Khasi sor bad khap sor.
Nalor katta la plie lad ruh ïa ki nongïalam jong baroh ki tnat Seng Khasi ba kin ïa ai lem ïa la ki jingmut ban pynjanai ïa ka rukom ïa treikam jong ka Seng Khasi Kmie ïa kaba baroh ki tnat Seng ki la pynpaw ka jingkmen ban ioh ïa kane ka lad kaba ki la ïai ap khmih lynti baroh shi katta. Ki nongïalam ka Seng Khasi Kmie ki la pynpaw ba nangne sha khmat kin leit ban ïa kynduh pat sa ïa kiwei pat ki tnat Seng ha ki lyngba ki shnat (circle) bapher bapher ban pynsngewthuh bad tyrwa ïa katei ka juh ka jingthmu. Shuh shuh ki nongïalam ka Seng ki pan ruh ka jingkyrshan na baroh ki tnat Seng khnang ban lah ban pynurlong ïa kane ka jingthmu ha ka ban saiñ dur thymmai ïa ka rukom treikam jong ka Seng hapoh kawei ka shatri.
Kum ka dak jong ka jingsdang ban ïa trei lang noh ryngkat bad ki tnat Seng Khasi, ka la don ruh ka jingsam ïa ka Riti Treikam 2018 ka Seng Kasi Kmie, ka soskular bad kiwei kiwei sha ki nongïalam jong ki tnat Seng Khasi, ha kaba la ai por ïa ki ba kin rah sha la ki tnat ki jong ki ba kin da ïa shong bad mir jingmut bha bad la ka kynhun ka jong ki bad ban ai ïa la ki jong jingai jingmut ban lah ban pynbha ïa ka rukom treikam jong ka seng Khasi.
Hadien ba la kut ka prokram u Rgh Arwan Sing Tariang, vice president ula shim pat ïa ka bynta ba un ai khublei ïa baroh kiba la wan poi sha kane ka jingïalang.