Press "Enter" to skip to content

15 snem ha along ngat u ba leh beitjot ïa ka khynnah 8 snem

Nongstoiñ, Nailar 8: Ka Iingbishar ba don burom jong ka District Session Judge West Khasi Hills District, ka la rai pynrem da ka saja kaba 15 snem kynthih ha along ïa u runar u ba la leh beijot ïa ka khunlung 8 snem na ka shnong Nongthymmai jong ka thaiñ Mairang.
Kane ka rai ka la mih hynne ka sngi ha kaba ka Iingbishar ba don burom ka la rai ban set along ïa u Krekborlang Sawkmie na ka shnong Nongthymmai 15 snem kynthih bad un hap ban siew ruh ïa ka kuna kaba 20 hajar tyngka.
Kumban shu pynkynmaw ba u Krekborlang Sawkmie u la bat bor ïa ka khynnah 8 snem na katei ka shnong hi ha ka taiew ba nyngkong jong u bnai Jylliew 2013. Ha katei ka por u dang don tang kumba 19 snem karta. Hynrei ha kajuh ka taiew ki pulit jong ka West Khasi Hills ki la ïoh kem noh hadien ka jingujor ba ki la ïoh pdiang. Na ka liang ka Iingbishar pat hadien ka jingtian bishar ryngkat ki sakhi satar ka la rai pynrem ïa u katkum ka kyndon aiñ POCSO Act.