Press "Enter" to skip to content

Ai jingmut ka kynhun MDA ia ka Sorkar ban pynkhlaiñ ia ki Infiltration Check Gate

Shillong, Nailar, 09: Ka kynhun Meghalaya Democratic Alliance (MDA) mynta ka sngi ka la ai ka jingmut ïa ka Sorkar Jylla ba kan pynkhlaiñ ïa ki Infiltration Check Gate kiba don ha kylleng ki District ka Jylla khnang ban khanglad ïa ka jingwanrung laitluid ki mynder ri ki bym shym la rung kyrteng ha ka Final Draft jong ka National Register of Citizen ba la pynmih paidbah dang shen da ka Sorkar Assam.
U Bah Prestone Tynsong, Symbud Myntri Rangbah ka Jylla ha ka jingïakren bad ki lad pathai khubor u la ong, “ngi la ïakren sani bha halor ka jinglong jingman kaba la jia ha ka Jylla Assam na ka jingpynmih ïa ka
Final Draft jong ka National Register of Citizen (NRC) namar ki paidbah ki sngewkhia bad ki sheptieng ruh.”
“Ka jingïalang jong ka MDA ba la ïakynduh mynta ka sngi ka la ïakren sani bha halor kane bad ka MDA ka la ai jingmut ïa ka Sorkar ba dei ban pynkhlaiñ noh marmar ïa ki Infiltration Check Gate kiba la don bad kiba la treikam lypa haduh mynta bad kumjuh ruh ban wad jaka ruh na ka bynta ban pynieng shuh shuh sa katto katne ki Infiltration Check Gate lada donkam ha kano kano ka bynta jong ka Jylla,” u la ong.
U la ïathuh shuh ba ka MDA ka la ai jingmut ruh ïa ka Sorkar Jylla ba kan peit bniah biang ïa ka aiñ bad ïa ka Rules jong ka Meghalaya Resident Safety and Security Act, 2016 khnang ban pynjanai shuh shuh ïa kane ka Aiñ.
U Bah Hamletson Dohling, Myntri ka tnat Urban Affairs u la ïathuh ba ka Sorkar Jylla ka ladep bthah ïa ki Deputy Commissioner, ki Superintendent of Police, ïa ki Officer Incharge jong ki Thanat ba kin long kiba peitngor namar ba kane ka long ka kam kaba khia.
U ïathuh ba ka Sorkar ka ladep bthah ïa ki Nongsynshar shnong ba kin long kiba peitngor bad kiba ïatreilang bad ki bor sorkar bad lada lap ïa kino kino ki briew ba i suba ki dei ban pyntip sha ki bor synshar Distirct lane sha ki pulit khnang ban leh ïa kaba donkam.
Ha kajuh ka por u la ïathuh ba ka MDA ka la ïakren sani ruh ha kaba ïadei bad ka elekshon shiteng samoi ha South Tura bad pynpaw ruh ïa ka jingkyrmen bad u Conrad K. Sangma un jop donburom khnang ba ka Sorkar synrop MDA kan neh haduh kaba kut jong ka samoi san snem kynthih.