Press "Enter" to skip to content

Bthah ka HLC ban lum jingkheiñ biang ia ki Kharmetor basah ha Them Iew Mawlong

Shillong, Nailar, 09: Ka High Level Committee ba la thung da ka Sorkar Jylla mynta ka sngi palei ka la bthah ïa ka Directorate of Land Records bad ïa ka Shillong Municipal Board (SMB) ba kin sdang biang ïa ka jinglum jingkheiñ ïa ki nongtrei ka Shillong Municipal Board bad ïa kiwei pat kiba dei ki trei ha kiwei kiwei ki tnat treikam ka Sorkar khnang ban ïoh jingkheiñ ïa kiba dei hok ki nongtrei ka Sorkar bad ïa kiwei pat kiba shu wan sah be-aiñ ha Them Iew Mawlong.
U Bah Prestone Tynsong, Chairman ka High Level Committee haba kren sha ki lad pathai khubor u la ïathuh ba ka Committee ka la sngewdei ban ïoh shuh shuh ïa ki jingpynshai ha kaba ïadei bad ka jinglong trai ka Sorkar Jylla ïa ka Them Iew Mawlong ïa kaba yn sa aiti da ka Directorate of Land Records, ka Shillong Municipal Board (SMB), ka tnat Urban Affairs bad ka Ophis u Syiem ka Hima Mylliem.
“Shen ngin sa sdang biang ban phah lum jingkheiñ namar ngi don ka jingsngew khia ïa la ki jong ki nongtrei ha kaba yn sa leh da ka Shillong Municipal Board,” u la ong.
Katkum ka jingïathuh jong une u Chairman ka HLC, ki don 128 ngut ki nongtrei jong ka Shillong Municipal Board kiba shong basah ha Them Iew Mawlong da ki phew phew snem.
“Ïa mynta ngam pat lah ban ïathuh katno ngut ki nongtrei ba dei hok jong ka Sorkar bad katno ngut kiba shu wan sah beaiñ ha katei ka jaka (Them Iew Mawlong,” la bynrap u Bah Prestone.
“Ngi la rai ban pan ïa ki Dulir na baroh ki tnat ba kynthup ïa ka Directorate of Land Records, na ka Urban Affairs, na ka ka Shillong Municipal Board (SMB), bad na ka Ophis u Syiem ka Hima Mylliem ha kaba kin sa aiti biang sha ngi khnang ban ïoh bishar bniah bad shen ngin sa ïakynduh ban shong pyrkhat halor kane,” ong u Bah Prestone.
U ong ruh namar ba kane ka kam ka dang sah ha ka miej jong ka Iingbishar High Court, ka Committee ka la shu leh thik tang ïa kam ba la bthah da ka Sorkar.
Katkum ka jingïathuh jong une u Chairman ka High Level Committtee, ka hukum ba la pynmih da ka Iingbishar High Court ka ong, “lada phi kwah ban pynkynriah ne pynpra ïa ki katto katne ki jingtei ba la don lypa, ka Shillong Municipal Board ne kino kino ki bor ba dei peit ki donkam ban da ailad shwa ïa kino kino ki ban shah ktah.”
“Kane ka pyni shai kdar ba kam don satia ka kano kano daw ban shah rem ha ka mukotduma,” ong u Bah Prestone haba kdew katkum kane ka hukum ba la pynmih da ka Ingbishar High Court halor ka jingdawa ban pynkynriah ïa ki Punjabi na ka Them Iew Mawlong. Lah ban kdew hangne, ka Sorkar Jylla ka la thaw ïa ka High Level Committee hadien ba ka la mih ka jingïakhih kaba jur bha ha ka nongbah Shillong kaba la khie ha ka miet 31 tarik Jymmang ha kaba ki paidbah ki la dawa ba dei ban pynkynriah noh ïa ki briew kiba sha Them Iew Mawlong hadien ka jingshah shoh pynmynsaw jong ki lai ngut ki khynnah Khasi ha ki Punjabi.