Press "Enter" to skip to content

Da ka prokram ai jinghikai ka NHMMS ban kiar na ka ïoh khun khynnah

Shillong, Nailar 9 : Ka National Health Mission, Meghalaya State (NHMMS) ka la sdang ia kawei ka prokram ba kyrpang ban ai jinghikai ïa ki kynthei ban kiar na ka jingïoh khun khynnah. ïa kane ka prokram la pynlong da ki jingïalehkai ha ki surok, jingpyni ïa ki prokiram bapher bapher, ka jingïaphylliew jingmut ha ki bynta bapher bapher jong ka ri lum Garo.
Ha kane ka taiew baroh shi taiew la pynlong ïa ki jingïalehkai bad pyni dur ha surok khamtam ha ki sngi ïew jongka North, South, West , South West bad East Garo Hills. Khnang ba baroh ki ïoh jingtip bha halor kane ka prokram la pynlong ruh da ki jingïaleh kai sport, kyntip jingkyntip, ki jingshad bad kiwei kiwei.
Lyngba ki jingïaleh kai drama ha ki surok, ki samla lud bad ki kynthei khynnah ki la ïoh jingtip bniah bha kumno ban kiar na ka jingïoh khun khynnah. Ka jingdonkam ban leit kha khyllung sha ki hospital ruh la ïakren ha kane ka prokram.
Ka NHMMS ka la pynlong ïa kane ka prokram Information Education Communication (IEC) ka long beit halor ka thong ban pynsgnewthuh ïa ki ‘[thei samla lud ba kam bha ïa ki ban ïoh khun khynnah namar kumba long mynta ka Meghalaya ka la kiew palat ka jingïoh khun khynnah lada ïanujor bad kaba la jia ha ka ri baroh kawei.
Ha ka jingpynlong ïa kane ka prokram ki long kmie ki samla bad ki samla lud na ki thaiñ nongkyndong ki la ïoh ban pynpaw ba ka daw baroh ka ju jjia ha ki thaiñ nongkyndong ka dei namar ba ki samla lud kim don jingtip haduh katno ka ktah ïa ka koid ka khiah lada ïoh khun khynnah.
“ Ngi sngewkmen shi katdei eh ba ka sorkar ka la ai jinghikai ïa ngi halor kane ka kam.Ngi ïaroh ïa kane ka jingleh jongka sorkar ban pynsngewthuh ïa ki paidbah. Ka long kaba bha tam ba ki khynnah ne ki samla lud kin ïoh jingtip lyngba ki prokram bapher bapher” ong u Augustine Marak u wei na ki nongsynshar shnong uba la ïadon ryngkat ha kane ka prokram ha Bajengdoba, North Garo Hills.
Ka Sweety Sangma ka khynnah skul Class X kaba la ïashim bynta ha ka jingiakob shad ka la ong “ Ng la wan ban ïashim bynta ha kane ka jingiakob shad hynrei nalor kane ki don sa kiwei kiwei ki prokram kiba la ai jingtip bha ïa ngi ïa ka rta ba paka ba ngin shong kurim”.
Kane ka prokram kaba la sdang naduh ka 2 tarik Nailar kan kut haduh ka 16 tarik Nailar 2018.