Press "Enter" to skip to content

Dawa ka KSU ïa ki pulit ban sangeh ka jingthwet bad khynra ïa ki dkhot ka seng

Shillong, Nailar, 09: Ka Khasi Students’Union (KSU) South West Khasi Hills District ka la dawa na ki bor Sorkar ban sangeh noh mardor ïa ka jingthwet ïa ki dkhot ka seng khamtam ïa ki nongïalam bad ki dkhot jong ka Umdohlun Circle na ki thaiñ Phlangdiloiñ bad ïa ki nongïalam ka Photumiap Area Unit, Phlangdiloiñ1 Unit bad kiwei kiwei ki nongïalam na kiwei ki Unit jong ka KSU South West Khasi Hills District halor ka jingkynnoh ba ki donkti ha ka kam thang kali bad shoh briew ha Mawthabah bad Wahkaji ha ka 25 tarik.
U Samla Forwardman Nongrem, President ka KSU South West Khasi Hills ha u kyrwoh ba la phah mynta ka sngi palei u la ong, “kumba long mynta, ka jingwan khynra da ki bor pulit ïa ki dkhot ka seng ka la long thik kumba wan khynra lehnoh kaba la pynthut pyndik
ïa ki bahaing hasem bad kaba la pyntieng pynsmiej ruh khamtam ïa ki khunlung khynnah hapoh jong katei ka thaiñ bad kiwei kiwei ki jaka. Kumta, kane la pynlyngngoh shikatdei eh i angi kum ka seng halor ka rukom treikam jong ka Sorkar.”
“Ka jing wan ksam Uranium sopsop ha Mawthabah ka pynpaw shai kdar ba ka AMD ka la ïaid lait na ka Sorkar bad District Council bad ka pyni ba kam kheiñ snep satia ïa kine ki ar tylli ki bor jong ka jylla bad dei na kane ka daw ka wanrah ïa ka jingsah umdum kaba ngim lah ban sngewthuh ïa ka daw tynrai. Ngi sngew lyngngoh kumno pat ki bor Sorkar ki phaikhmat bad kynnoh ïa ki dkhot ka seng halor ki jingjia kiba ladep. “Kane ka pynlong shuh shuh ïa ngi ba ngin long artatien halor kane ka kam,” ong une u nongïalam ka Seng.
“Ha ka jingshisha, ka Sorkar ladei ban phahkem bad pynshitom ïa ka AMD bad ïa u Contractor namar ki la ïaid lait ïa ki ar tylli ki bor hynrei kumba ka paw mynta ka Sorkar ka pynkylla sohpdung ïa ki dkhot jong ka seng bad ïa ki riewpaidbah jong ka District. Lada ka long ha kane ka dur ngin nym lah ban shuh sngap ne burom sah katba ka jingkhynra kan ïai bteng kumne bad shah kynnoh khamakha ïa ki dkhot bad katto katne ki paitbah ka thaiñ,” ong shuh shuh une u nongïalam ka Seng.
“Ngi ieh ha ka jingstad bad jingsngewthuh ki bor Sorkar ban ym pynklang ïa ka ding hynrei ban tem noh mardor ïa ka katba ka por ka dang shah lem kumta ka AMD bad Contractor ki dei ban shim jingkitkhlieh namar dei ma ki kiba wanrah ïa ki kynrum kynram bad ha kajuh kapor bad ka pynkheiñ ïa ka bor Sorkar Jylla bad ka bor jong ka District Council,” la ong shuh shuh ka Seng.
“Ngin sa shong ka jingïalang ryngkat bad ki nongïalam ka Sengkmie ha kine ki khyndiat sngi namar ngim ym lah ban shu sngap ïa ka jingshah khynra bad shah pharep ki dkhot ka seng. Ka seng kam ju kwah ne jied ïa ka lynti jong ka jingkulmar hynrei ha ka bym banse ngin hap ban jam ïa kata ka lynti lada kane jinglong jingman ka ïaibteng kumne ban ïai khynra ïa ki dkhot bad pyntieng pynsmiej ïa ki paidbah bad ïa ki khunlung khynnah,” ong u Samla Forwardman.
“Ka KSU South West Khasi Hills ka sngew ban ong ba ka AMD bad u Contractor ki dei ma ki ban shah kynnoh namar ki pynkheiñ ïa ka iktiar ka Sorkar bad District Council bad dei ma ki nyngkong kiba dei ban shah pynshitom mardor ha ki bor ka aiñ,” ong shuh shuh u kyrwoh na une u nongïalam ka Seng.