Press "Enter" to skip to content

Hato ka sorkar NPP kan lah ban rat dyngkhong ïa ka bamsap

Baroh ki nongshong shnong ka jylla mynta ki phaikhmat sha ka sorkar jylla ba ïalam da ka National People’s Party (NPP) ban pynkut noh ïa ka kam bamsap ha baroh ki liang khamtam eh haba ïadei bad ka jingpyntrei ïa ki kam pynroi. Ha kajuh ka por, ka don ruh ka jingkyrmen wat haba ïadei bad ka jingtrei kam jong ki District Council jong ka jylla kiba la ïalam ïa ka bor synshar da ka NPP. Hynrei haduh katno, katei ka jingkyrmen jong ki paidbah kan seisoh.
Ka bynta kaba nyngkong eh ba ki paidbah ki buh ka jingkyrmen ka long eh ban pynkhuid ïa ka sarang jong ka bamsap kaba la ju bna na ka por sha ka por ba ka don ha ka thungkam thungjam jong ki samla ha ka jylla. Ka don ruh ka jingkyrmen ba ki samla lyngba kane ka sorkar ba mynta kin ym donkam ban da pynlut por bad pisa ban ïoh ïa ka kam sorkar khlem da donkam shuh ban leit kynduh Myntri sorkar ne ki ophisar rangbah ban phah khroh ne pynïakren lem ïa ki.
Ka bynta kaba ar pat ka long ruh ban pynduh noh ïa ka jingpan bhah ne ka baisha haba don kano kano ki jingpyntrei kiba heh la ka long haba ïadei bad ki surok, ki jingtei bapher bapher kiba ïadei bad u paidbah khnang ba ka jingmang pisa na ka bynta kano kano ka jingtrei kan leit pura sha kato ka jingtreikam khlem da bakla lynti ne lah ban ong ba kan ym bakla lynti sha ka pla jong kito kiba don ha ka bor katba ïa ka kam pat la hap ban shu trei ne pynlut malu mala tang dep namar ka pisa kaba la mang jan mar shiteng ka la lut tang ha kaba siew bai sha.
Nalor kiwei kiwei ki jingkhmih lynti, ki paidbah ka thaiñ ki phaikhmat ruh mynta sha ki ADC khamtam kum sha ka KHADC kaba dei ka Council kaba don ha ka nongbah jong ka Jylla. Kum ki paidbah ki kwah ba ka jingtreikam jong ki Council kan long ban ïada ïa ka khyndew ka shyiap ne ka riti dustur bad khamtam eh ban peit ïa ka khaii pateng kumba ka KHADC kadei ban tuklar ïa ka iew kaba heh duh ha ka jylla, ka Iewduh. Ka jingkyrmen ka don ruh mynta ha ki paidbah ba kane ka Executive Committee ba mynta kan lah ban wanrah biang ïa ka jingpynïaid iew kaba khuid ba suba kumba la lamkhmat da ka EC kaba ïalam da u Bah Ardent Miller Basaïawmoit kum u CEM ha kato ka por.
Kyllum lang, lada ïa kren beit ïa ka bamsap, lah ban ong ba ka jingtreikam mynta kam dei eh tang ïa ka sorkar jylla ne District Council hynrei ka donkam ruh ïa ka jingkitkhlieh jong baroh ki nongshong shnong kynthup ïa kito kiba don ha ka bor ban ong em ïa ka bamsap bampong kaba dei ka dawbah jong ka jingsahdien ha ka jylla.
Haba kren shaphang ka kam bamsap bunsien ruh ka ju mih kata ka jingkynnoh tang ïa ki nongmihkhmat la ka long naduh ki Myntri sorkar, ki MLA bad MDC ne ïa ki ophisar sorkar, hynrei haba bishar bniah pat ïa kane ka kam bamsap mynta ka la rung lut ha baroh ki bynta kata naduh ki kam shnongkam thaw, ki kam ing kam sem, kam seng bad kiwei kiwei, kaba la pyntroiñ shisha ïa longbriew manbriew ha ka jylla bad ka thaiñ hi baroh kawei.
Katei ka jingsahdien hi kadei namar ka don ka daw tynrai, kata ka bamsap ha ki bun rukom, da ka pisa, da ki kam, da ki jingïa pyrshah bad kiwei kiwei kiba long thik kum ki thliem kiba kjit bad bam klop ïa ka hok jong u paidbah ba ka sorkar jylla ne sorkar pdeng ka la ju ïarap kyrpang lyngba ki kam pynroi jong u paidbah.
Sngew sangsot ban phai sha ki jaka nongkyndong kiba hap mad tang da ki jingeh suda ha ka jingim kata naduh ka jingduna ki umbam umdih, ki lynti ki synkien, ka koit ka khiah bad kiwei kiwei pat ki kam pynroi ha kaba la ju ïa kynnoh ba dei namar ba don kata ka jingbamsap ïa ka hok u paidbah.
Ha kawei ka bynta, ka jingkren ba sahdien ki kam pynroi ka dei na ka daw ka jingdon jong ka kam bamsap ka long kaba don nongrim, hynrei ban ong pat ba ka dei 100 persen tang na ka daw ka bamsap ka dei ka kam ka bym lah ban pdiang namar bunsien wat ki paidbah ruh ki ngop ha ka kam bamsap ha kaba kim ju pyrkhat ïa lade ba ki bamsap hynrei ki kloi ban kdew pat ïa ki nongmihkmat bad ki ophisar sorkar.
Lah ruh ban kdew shai hangne ba ka kam bamsap mynta ka la rung ha man la uwei pa uwei u briew khamtam ha ka por elekshon ba ki paidbah ki ju biej ïa ki sbai rupa kaba ki ju ïoh tang ha ka shi khyllipmat jong ka por elekshon hynrei ynda la kut katei ka aïom ksiar pat ki ju lynñiar ba duna kane katai kaba dei na ka jingleh bakla khlem da bishar bniah shuwa ban kner ïa ki Kti.
Hap ruh ban kynnoh ba ka kam bam sap mynta ka la rung ha man la uwei pa uwei u briew kaba ngim da donkam ban shu kynnoh ne ban pynkitpap tang ïa kiwei bad lada ki paidbah ki sngewthuhshisha ba ka kam bam sap ka ktah ïa ka imlang ka sahlang bad ka roi ka par upaidbah ka la dei ka por ba ki hap ban ïa pyrkhat arsien na ka bynta ban shim ia ka jingkitkhlieh hynrei ki dei ban pyrkhat ba ïa katei ka kam donkam ban rat dyngkhong shuwa ïa lade shimet bad nangta sa peit ïa kiwei.
Kumba ong ka ktien riewstad, “ wat peit ïa u thngiat kiwei, hynrei peit shuwa ïa u khung…..” bad dei hangta ngin sa lah ban pynduh pyndam bad ban pynduh jait ïa ka kam bamsap bampong ha ka imlang ka sahlang, ha ka ri ka raid bad ha ka jylla bad ka ri hi baroh kawei.
Lada ngi kwah ba ka imlang ka sahlang kan long kaba khuid to ngin ïa phai khmat khyndiat kiei ki jingjot ba wan rah ha ka imlang ka sahlang da ka jingdon ka kam bamsap. Khlempep ka jingjot kaba wanrah na ka jingbam sap ka ktah lut ba baroh ki bynta jong ka imlang ka sahlang ha kaba lada phai sha kino kino ki bynta ruh ngi la long lypa kita kiba shah knieh jubor ne knieh jyndat ïa ka hok kaba ngi dei ban ïoh. Bad dei namar kata ba ki shnong ki thaw, ki ri ki Raid bad ka jylla ka dang sahdien ha baroh ki liang kiba dei ki daw tynrai ba mih na ka jingdon ka jingbamsap bam phong.