Press "Enter" to skip to content

Khynra Trading bad Labour License ka District Council ha thain Jorabat-Khanapara

Nongpoh, Nailar 09: Ki bor ba dei peit haka khaii ka pateng na ka Khasi Hills Autonomous District Council, jong ka tnat Enforcement Wing, kiba la don kumba 6 ngut ei ei, hynne ka sngi ki la hiar ban khynra Trading License bad Labour License ïa ki Bar jylla kiba don dukan bad pynlong jaka khaii ha ki thain Mawsmai Jorabat ha Ri Bhoi District kiba dei ki shnong khappud ka Meghalaya bad Assam.
Ha kane ka sngi, ki pulit Enforcement Wing ka KHADC ki la pynlong ïa katei ka jingkhynra naduh ka por 11 baje ei ei mynstep, ha kaba ki la ioh ruh ban khynra ïa kumba 28 tylli ki dukan bar jylla bad na kitei ki 28 tylli ki dukan kaba kynthup ïa ki Petrol Pump la lap ba ki la don kumba 7 tylli na kitei ki dukan bad Petrol Pump ki bar jylla kiba ym shym la don ka Trading License na ka KHADC.
Ha katei ka jingleit khynra Trading License kaba la ïalam da u Bah F. Kharsyntiew naka tnad Enforcement wing ka KHADC ryngkat ka jingsynran lang da ki Rangbah Shnong jong ki shnong kiba don ha katei ka thaiñ.
Hadien ba la kut katei ka jingleit khynra, ki pulit jong ka Enforcement Wing, ki la ïathuh ba kin dang ïai bteng ïa katei ka jingkhynra dukan bar jylla kiba don ha katei ka thain naka bynta ban lap shuh shuh ki bar jylla kiba khaii beaiñ ha katei ka thaiñ khappud khlem ki kot ki sla kiba biang naka KHADC.
Shuh shuh ka jingwan khynra Trading bad Labour License da ka KHADC, na ka liang ki nongïalam shnong jong katei ka thain, ki la pynpaw ïa ka jingkmen bad ki da ai mynsiem ruh ïa ka KHADC ba kin dang ïaid shakhmat halor katei ka kam khynra trading bad labour license.
Ki rangbah shnong, ki la ai ruh ka jingkular sha ka District Council ba ki kloi ban ai ka jingïatreilang na ka bynta ban khynra ïa baroh ki dukan bad ki kam khaii jong ki bar jylla kiba don ha katei ka thain kaba la jyllei bha da ki bar jylla.