Press "Enter" to skip to content

Na paiñkhana sha dam Mawphlang lap ka PHE ba pyntuid jaboh ka skul JNV

Hap pynsangeh ïa ka skul ban ym jakhlïa ka umbam : FKJGP
Shillong, Nailar 09 : Ka tnad Public Health Enginee ring (PHE) jong ka sorkar jylla ha ka sngi Palei ka la lap markhmat ba ka skul Jawahar Navodaya Vidyalaya (JNV) kaba don ha Mawphlang ka la pyntuid ïa ki jaboh paiñkhana kumjuh ïa ki jakhlïa kiba mih na jaka shet beit beit beit sha ki wahduid kiba poi sha ka Dam Mawphlang, kaba dei ka jaka pynlang um kaba bsa umbam umdih ïa ka nongbah Shillong baroh kawei. Katei ka jingpyntuid ïa ki jaboh paiñkhana ka la paw pyrthei hadien ba ka FKJGP Mawphlang ka la ïalam ïa ki engineer na PHE Mawphlang ban leit jurip markhmat hadien ba ka la don ka jingujor na ka por sha ka por halor ka jingpyntuid ïa ki jaboh na katei ka skul shapoh katei ka jaka pynlang umbam umdih.
Na ka liang ka seng hapoh ka jingïalam jong u Bah Jefferson Kharshiing hadien ba ki la dep ban pyni ha ki briew ka PHE ba mihkhmat da u Bah H Rani, Junior Engineer Mawphlang, ïa ki jaka pynlang ïa ki jaboh paiñkhana (septic tank) kiba lait bad tuid pat sha ki wahduid kiba poi sha katei ka dam Mawphlang, ka la pyni ruh ïa ki jaka ba pyntuid ïa ki jaboh bad ki jakhlia baroh kiba mih na kamra shet jong katei ka skul ïa kiba la pyntuid sha kawei ka top dewbilat kaba don ha ranab jong ka dam Mawphlang.
Haba kren bad ki lad pathai khubor, u President ka seng u la ong ba markhmat ryngkat na ka PHE ki la ïohi markhmat ba kitei ki jaboh ki tuid beit beit sha ka dam Mawphlang khamtam lei lei haba jur u slap.U la ïathuh ruh ba wat ki bor shnong ne bor Hima ki la wan jurip teng ryngkat ka jingbthah ba katei ka skul kadei ban phah maramot kham kloi khnang ba kitei ki jakhlïa kin ym bteng ban mih shabar bad tuid pat sha katei ka jaka pynlang um.
“Lada kim leh noh kham kloi hap ban pynsangeh shwa ban long skul khnang ba ka umbam umdih kan ym jaboh na ka jingtuid jong kitei ki jaboh kiba mih na ka skul,” bynrap biang u President. Ha kajuh ka por ka seng ka ïathuh ruh ba lada ki bor ba dei peit ïa katei ka skul ki dang ïai buhteng, kim banse ban ujor shaduh u Myntri ka tnad PHE khnang ban leh da kaba tyngeh syndon.
Haba kren na ka liang ka PHE, u Bah Rani ula ïathuh ba katei kam dei shuh ka kam kaba thymmai hynrei kadei ka bynta kaba ka tnad ka la dep ban tuklar la katto katne por. U la ïathuh ruh ba dang ha u snem ba la dep ki bor shnong ki la ujor lang halor katei ka jingjia ha kaba na ka liang ka PHE ruh ka la shimkhia bad phah ïa ka kaiphod sha u Chief Engineer.
U la ïathuh ba u CE ha kato ka por u la phah da ka shithi sha u Deputy Commissioner halor katei ka jingjia. Nalorkata, u ong ruh ba wat na ka liang ka State Pollution Control Board ka la phah da ka jingthoh sha u principal jong katei ka skul tangba haduh mynta ym pat don dak ei ei.
Kumta, utei u Engineer u la ong ba ha kane ka kynti ba mynta ruh un sa phah biang ïa kitei ki jinglap baroh sha ka tnad khnang ba kan leh ïa kaba donkam. Ha kane ka sngi, ki nongïalam ka FKJGP ki la thmu ruh ban kynduh ïa u Principal tangba la pyntip ba um don satia.