Press "Enter" to skip to content

Plie pyrda ka skul Stephan Memorial ïa ka taïew pynisap

Shillong, Nailar 09 : Ka skul Stephan Memorial kaba don ha Mawlai Mawroh ha ka sngi Palei ka la plie pyrda ïa ka taiew pynisap ha kaba u MLA barim ka thaiñ, Bah Embhahlang Syiemlieh u la long u Kongsan.
Ïa kane ka taiew ba kyrpang jong ki khynnah skul yn pynhap pyrda noh haduh ka 15tarik mynta u bnai.
Na ka liang u Kongsan haba kren ha katei ka sngi u la ong ba katei ka Creative Week, ka long kum ka rynsan na ka bynta ki khynnah skul ba kin ioh lad ban pyni ïa bun ki sap bad ki talen ba ki don. U la ai ruh ka jingïaroh ïa ki nonghikai kiba la plie ïa kum katei ka lad na ka bynta ki khynnah nalor ka lyngkor kaba ki hap ban kit ban mait lynti ïa ka lawei jong ki ha ka pule puthi.
Ha kajuh ka por u la kyntu ruh ïa ki khynnah skul ba kidei ruh ban nang kumno ban pyndonkam ïa ka por la ka long ban pynjanai ïa ka sap ba ki don bad ruh ha ki jingpule jong ki khnang ba kin poi sha ka thong ha ka jingim.
U la ai jingïaroh ïa ka jingstad ki khynnah skul kiba pyni ïa ka sap jong ki ha katei ka lympung. Ha kajuh ka por u la kular ruh ba un iai don lang bad ka skul nangne shakhmat khamtam haba ka thong jong u ka long ban kyntiew ia ka pule puthi ha ka thaiñ baroh kawei.
Na ka liang ki bor pynïaid skul ki la pynpaw ka jingsngewnguh ïa utei u MLA barim uba la ïarap ban pynshna ïa ka madan ha katei ka skul na ka bynta ka jingmyntoi jong ki khynnah skul.