Press "Enter" to skip to content

Plie u Myntri ka tnad PHE ïaka skhim umbam umdih ba 4 klur tam ha Marngar

Nongpoh, Naitung 09: Ka long ka jingkyrkhu kaba khraw ïaki paidbah nongshong shnong haka thaiñ Marngar ba kim donkam shuh ban khuslai ha kaba ïadei bad ka jingkyrduh um, hadien ba la lah ban plie paidbah noh mynta ka sngi ïaka Skhim umbam umdih kaba la ap khmih lynti baroh shi katta da ki paidbah ki shnong haka thaiñ Marngar. Ïa katei ka skhim umbam umdih kaba bit ba biang ban sam sha ki shnong haka thaiñ Marngar kaba la tip kum ka Lalumpam Combine Water Supply Scheme la mang pisa lyngba ka Rural Drinking Water Programme (NRDWP) haka jinglut kaba la kot sha ka T.4, 88, 70,600/-, ha kaba ïa katei ka project la sdang naduh u snem 2003 bad dei da ka jingtrei shitom jong ki ophisar ka tnad PHE bala lah ban pyndep bad plie noh syndon ïaka mynta ka sngi.
La wan ruh ban plie paidbah ïaka Lalumpam Combine Water Supply Scheme da u Bah Samlin Malangiang, Myntri ka tnad PHE ka sorkar jylla kum u kongsan bad u Bah Mayralborn Syiem MLA ka Nongpoh kum u symbud kongsan.
La sakhi ruh ha katei ka sngi ka jingplie ïa katei ka project sam um sha ki paidbah da ka jingdonlang ki paidbah nongshong shnong ka thaiñ Marngar, Bah SK Blah Chief Engineer ka tnad PHE, Bah D Marbaniang SE PHE Ri-Bhoi Circle, Bah DD Umdor Executive Engineer ka Nongpoh Division, Richard Syiem Syiem jong ka Raid Marngar, ki Rangbah Shnong ryngkat ki khynnah skul kiba la pynphuh pynphieng ïaka jingialang da ki jingshad bad jingrwai kaba la long ha Auditorium haka shnong Marngar.
Haba kren kum u kongsan ha katei ka sngi u Bah Samlin Malngiang Myntri ka tnad PHE ka sorkar jylla u la ai ka jingïaroh ïaka tnad PHE halor ka jingtrei shitom naka bynta ban pyntreikam hok ïa katei ka skhim kaba ki paidbah kila ap khmih lynti baroh shi katta haduh bala lah ban plie paidbah noh ïaka mynta ka sngi kaba long ka jingmyntoi kaba khraw ïaki paidbah nongshong shnong katei ka thaiñ.
Kumba ïa katei ka project la pynlut ruh da ki klur tyngka, naka liang u Bah Samlin Malngian u la kyntu ruh ïaki paidbah ba kin pyndonkam hok ïaka jingmyntoi kaba ki ioh na katei ka skhim kumba la khmih lynti ba katei ka skhim sam um kan ai ka jingmyntoi ïa baroh ki paidbah nong shong shnong ha katei ka thaiñ ba kin nym mad shuh ïaka jingkyrduh um.
Kum u Myntri ka tnad PHE ka sorkar jylla u Bah Malngiang u la air uh ka jingkular ba un dang shimkhia ban wad ïaki lad ki lynti naka bynta ban wanrah shuh shuh ïaki skhim pynroi haka jylla bad khamtam ka thong ka long ban pynioh ïaka umbam umdih kaba bit biang sha man la ki shnong haka jylla, la bynrap utei u myntri ka tnad PHE.
Ha kane ka sngi la ai jingkren ruh da u MLA ka Nongpoh u Bah Mayral Born Syiem u ba la pynpaw ïaka jing sngewkmen ban ioh plie ïa kane ka skhim umbam umdih ba ki paidbah kila ap khmih lynti la slem bad u la kular ruh ban dang trei shitom naka bynta ban pynioh ïaki jingdonkam ki paidbah ha baroh ki liang khamtam u khmih lynti ba u myntri ka PHE un phaikhmat ym tang ïaki paidbah ka Nongpoh Constituency hynrei naka bynta ka jingdonkam jong ki paidbah haka district bad ka jylla hi baroh kawei ba kin ioh ïaka umbam umdih kaba khuid ba suba bad kaba bit ba biang.