Press "Enter" to skip to content

Thep ki Pulit ïa u shipai BSF ha ka POCSO ba thmu batbor ïa ka samla lud

Khliehriat, Nailar, 08: Ki Pulit ka Lumshnong Police Station mynta ka sngi balang ki la kem noh ïa uwei u shipai Border Security Force (BSF) uba la tip kyrteng kum u Dipankar Ghosh, na ka jylla West Bengla uba la thmu ban batbor ïa kawei ka samla lud kaba dang 16 snem ka rta ha kawei ka shnong ha East Jaiñtia Hills.
Ki pulit ki la pynngat ïa une u shipai BSF hapoh ka kyndon 9(b)(iii)10 jong ka POCSO Act.
Ka hymen jong katei ka samla lud ka la kynnoh ba utei u shipai BSF hynnin ka miet sngi balang ha ka por kumba 8.30 baje eiei mynmiet u la pyrshang ban batbor ïa ka para jong ka kaba dang 16 snem ka rta katba ka dang mih leit prie shabar namarba kane ka samla lud ka don hapdeng ka jingshitom na ka jingpangsuh.
Ka la ïathuh ba kane ka para, ka la wan ban sah bad ka na ka bynta ban leit shim dawai.
Kane ka hymmen ka la ïathuh ba ka ïohsngew ïa ka jingyniar ka para bad mar mar ka la mih shabar bad ïohi pynban ïa uwei u shipai uba phong da ka riam shipai ba u phet sha karkhana dewbilat jong ka Topcem. Marmar ka la kthong ïa u hynrei ynda poi hajan ka jaka bashong ki Shipai BSF hapoh ka phyllaw jong ka Topcem, kiwei pat ki shipai BSF ki la sei pynban da ki suloi ban pyntieng ïa ka. Kane ka hymmen hadien kane ka la leit mudui sha ki pulit bad pyntip ïa kane ka jingjia sha ki sengbhalang.
Ha ka jingïakynduh ki dkhot sengbhalang ïa u heh jong ka Topcem ha Thangskai,u R.K Pareek,u la ong ba ka jingpoi sah ki shipai BSF ha Topcem dei namarba sniew ka kali kumta ki la pan ban sah tang hi miet hynrei ki la sah pynban bun miet.
Haba kylli pat hato ka Topcem ka la pan bor neem na ka shnong ne pyntip neem sha ki bor ka aiñ, ki bor District halor ka jingwan sah ki shipai BSF u la ong ba ka Topcem ka khlem pan bor bad khlem pyntip ruh sha ki Pulit bad kaba sngewlyngngoh ruh ka long ba wat u Ma Phon Syih, uba dei u Local Director jong ka Karkhana Topcem um don jingtip eiei halor ka jingwan poi sah miet kitei ki shipai BSF.
Ki khynhun sengbhalang kiba kynthup ka Jaiñtia Students Movement (JSM) ba la lam khmat da u Bah skhem Dkhar, ka JSM Eastern Region, ba la lam khmat da u Baha Shanlad Rymbai, lem bad ka JSM Women Wing na Lumshnong lem bad ka Khasi Students Union, (KSU) Narpuh Circle ba la lam khmat da u Bah Kwilnis Suchiang, General Secretary ha ka jingïakren bad une u heh nongpeit jong ka Topcem ki la dawa ruh ba u dei ban pynmih noh mardor ïa ki shipai kiba shong sah miet ha Topcem bad ki la pynrem jur ruh ïa ka jingym kynjoh ktien jong ka Topcem na ki Waheh Shnong, na u Local Director bad ka jingïaid lait ïa ki bor ka aiñ.
U R.K.Pareek u la kubur ba u la leh bakla ba u khlem pyntip sha ki bor shnong,sha ki bor pulit bad ong ba kane ka dei ka jingsneng ïa u nangne shakhmat.
“Ngi pynrem jur ïa u Dipankar Ghosh, uba la thmu ban leh runar ïa ka samla lud kaba long kum ka kam riewkhlaw ka bym pyrkhat shuh ïa ki kynthei khynnah ruh,” ong u Bah Shanlad Rymbai, President JSM-ER
Ki nongshongshnong kiba don ha Chiehruphi ki la ïathuh ruh ba man ka sngi kitei ki shipai ki ju shang kylleng ka shnong bad ym tip na kaei ka daw ki ïaid kylleng bad ki la ïathuh ruh ba don ki BSF kiba la leit ban pan ja na ki lai tylli ki dukan.
Ki paidbah ka shnong Chiehruphi ki pynpaw ba ki don ka jingsyier na ka jingwan rung ki shipai BSF kaba la pyntieng pynsmiej wat ïa ki khynthei khynnah.