Press "Enter" to skip to content

Wan ba ar ka Meghalaya ha ka jingbun eh ki kamra skul ba hap moramot

Bthah ka tnad HRD ban peit ïa ka jingshngaiñ ki khynnah skul
Shillong: Ka jylla Meghalaya ka la wan baar hadien ka Assam ha ka jingdon bun eh ki kamra ha ki skul ïa kiba dei ban moramot kyrkieh. Katkkum ka kaiphod jong ka Unified District Information System for Education (UDISE), ka Meghalaya ka tam ïa ka National Average kaba long tang 7.73 percent, katba ha ka jylla pat ki kamra klas kiba hap ban moramot ki long 18.57 percent. Ka Assam ka wan nyngkong ha kaba ki kamra klas ba hap moramot ki don 30.32 percent.
Ha kaba phai sha ki skul kiba la jot bad don jingma ïa ki khynnah skul, ha Meghalaya ki don 1.89 percent. Kane ka ruh ka tam ïa ka National Average kaba long
tang 0.67 percent. Ka Assam ka wan ba nyngkong ha kande ka liang ruh, ha kaba ka don 4.13 percent ki skul ba la jot ban don jingma ïa ki khynnah skul.
Ka Ministry of Human Resource Development  lane ka tnad kaba peit ïa ka pule puthi ha ri India, ha ka 9 tarik u Risaw 2014, ka la pynmih ïa ki jingbthah ne ki kyndon na ka bynta ban peit ba ki khynnah skul kidei ban don ha ki skul kiba lait na ki jingma bad jingmynmaw. Ka Para 4.1.2 ha kane ka jingbthah ka ong ba ki ïing skul kidei ban long kiba khlaiñ bad skhem ka rukom shna, kiba lait na u slap na ka lyer, kiba lait ka jingma na u jumai, na ka ding, na ka ‘erïong, na ki jingshlei um bad kiwei kiwei de ki jingma na ki bor jong ka mariang ne na ki bor jong u briew. Ka jingbthah ka ong ruh ba ki ïing skul, kim dei ban don hajan ki jaka ba lah ban kem ding.
Kiwei pat ki jingbthah ki ong ruh ba ki skul kidei ban do ki jaka mih kiba biang ha ka por ba kyrkieh, nangta dei ban don ka um kaba biang bad u shyiap ban tem lada jia ba mih kano kano ka jingkem ding. Shuh shuh ka jingbthah ka ong ba ka dei ban don ka jingjurip kaba na ka por sha ka por ha kaba ïadei bad jingskhem bad jingshngaiñ ki skul. Ha ka 11 tarik u Nailur 2017, ka tnad HRD, ka la pynmih biang ïa ka jingbthah ba ïa kine ki kyndon dei ban bud pyrkhing bad dei ban don ruh ki monitoring committee na ka bynta kane.
Ka Department of School Education and Literacy ha ka 1 tarik u ïaïong mynta ka snem, ka la shna ruh ïa ka skhim ba la tip kum ka Samagra Shiksha, ka ban peit ïa ka jingpyntreikam ïa ka Sarva Shiksha Abhiyan (SSA), Rashtriya Madhyamik Shiksha Abhiyan (RMSA) bad ka Teacher Education (TE) ban ïarap ïa ki skul kiba ïoh skhim na ka sorkar ha kaba pynbiang ne peit bniah ban pyntreikam ïa ki skhim ba ïadei bad ka jingpynbha ïa ki skul.
Nangta ka National Disaster Management Authority (NDMA) h aka 1 tarik u Nailur 2017, ka la pynmih ïa ki kyndon ba ki jylla kidei ban bud na ka bynta ka jingshngaiñ jong ki ïing skul.
Ka National Commission for Protection of Child Rights (NCPCR) ka la ai jingmut ha ki bor pynïaid skul kum ki SMC, ki Principal, ka tnad pule puthi ki Board, ban pynlong ka jingjurip na ka por sha ka por ha kaba ïadei bad ka jingshngaiñ ki ïing skul.