Press "Enter" to skip to content

Wan poi u Rawat ban ïashim bynta ha ka Shillong 10-K ka SELDD KJP Synod Sepngi

Shillong, Nailar 9: U Nitendra Singh Rawat u la wan poi ha kane ka nongbah mynta ka sngi Palei, kum shi bynta ka jingwan ban ïashim bynta ka jong u sha ka ïakob mareh thong ka Shillong 10-K Run 2018 kaba VIII, ban pynlong ïa ka da ka Agency for Sustainable Development Initiatives kaba dei ka tnat treikam jong ka Social & Economic Life Development Department, KJP Synod Sepngi , kaban long lashai ka sngi Saitjaiñ, ka  11 tarik u Nailar 2018 naduh ka por 5:30 baje mynstep na Parking Lot, Polo, Shillong.
Ka Theme jong ka Shillong Run ka long “Run with Different Abilities” bad ka jingthmu ba kongsan eh jong kane ka Run ka long ban pynshai bad pynsngewthuh ïa ki nong shnong ïa ki jingeh bad ki jingdonkam ki briew kiba don ki jingduna ha ki dkhot met, ban kyrshan bad ban ñiewkor ïa ki bad ban kynthup lang ïa ki ha ka imlang ka sahlang.
Kane ka tnat ka peit bad khmih kyrpang ïa ki 3 tylli ki projek kiba ïadei bad ki briew kiba don jingduna ha ki dkhot met kata Mairang Vidyajyoti Inclusive School, San-shnong, Mairang, Com-munity Based Rehabilitation Programme for People with Disability, Mairang, Rev. Amirkha School for Disabled, Mawlai.
Haba ïakren bad ki lad pathai khubor mynta ka sngi ha nongbah, naka liang ki nongïalam jong ka SELDD ka KJP Synod Sepngi, ki ïathuh ba haduh mynta ka sngi ki nongïashim bynta ha kane ka jingïakob kin don palat ïa ka san spah ngut.
“Ngi sngewkmen shi katdei ba mynta ka snem ki nongïamareh sha kane ka jingïakob kin kynjoh ym duna ïa ka san spah ngut, kaba kham bun lada ngi ïa nujor bad u snem ba la dep” la pynpaw ki nongïalam jong ka SELDD.
Naka liang u Rawat u rang ïa mareh bna nam ka ri ba la mihkhmat ruh ha ka Rio Olympic u snem 2016, u sngew ban pynpaw ïa ka jingkmen ba kane ka dei ka sien kaba nyngkong ïa u ba un wan ban iuh kjat ha kane ka nongbah kaba jia ryngkhat bad ka jingther ka jong slap.
“Nga da kmen palat ka mynsiem namar ba ka jingwan iuh kjat kaba nyngkong ka dei artad ka jingther jong u slap” la pynpaw u Rawat.
Haba jubab halor ka jingïashim bynta ka jong u sha kane ka jingïakob, u Rawat u la ong ba u sngew-kmen ban ioh ïa kat kane ka lad ban ïashim bynta ha kane ka jingïakob kaba don lang ha ka ïa katta ka thong ban ïarap ïa ki briew kiba donkam ïa ka jingkner lem ki kti na ki para bynriew.
Halor ka jingkylli kumno u pat u ñiew bad shim ïa kane ka jingïamareh, hato don ne em ka jingïapher bad kiwei pat ki ïakob mareh kiba u la ïashim bynta, u Rawat u pynpaw ba ha ka liang ka jinglong ka suiñ bneng bad ka jaka, ïa u kam don satia ka jingeh, namar ïalade ruh u dei artad u briew uba la wan na ki jaka ba don ha ki kynang lum.
Tangba ka jingeh kaba u sngew ban ïashem ne ïa kynduh ka dei ki at ki them jong ki lynti ïa mareh.
U Rawat u sngew ban ai khublei kyrpang ïa u Ben-ningstar Lyngkhoi u paralok ba juh ïa mareh lang bad ba dei u nongai mynsiem ïa kiwei pat ki paralok nong-ïamreh ha ka ri, ba la kloi naka bynta ban khot sngewbha lem ïa u naka bynta kane ka ïakob ïa mareh.
Naka liang ki nongïalam ka SELDD ki pynpaw ruh ba na ka snem sha ka snem, ka thong kaba ki don ha ki ka long ban pynjanai shuh shuh ïa kane ka ïakob ïa mareh ka jong ki bad dei halor kane, kaba pynlong ïa ki ba mynta ka kynti kin sdang wat ban wan ïalam ïa ki snar ïa mareh bna nam jong ka ri.
“Ngi kwah ruh ba ngin pynpaw hangne ba mynta ka snem, ngi la pyrshang ban wer ïa kiba bun ki ïamreh bna nam jong ka ri, hynrei sngewsih pat ban ïathuh ba kine ki nongïamreh kim lah satia ban wan ban ïashim bynta namar ba ki bunkam ban pynkhreh ïalade naka bynta ka lympung ïalehkai jong ka Asian Games kaban long ha Indonesia mynta u bnai.
Shuh shuh ka SELDD ka kwah ruh ban ïathuh ba kane ka ïakob ïa mareh la pynlong kum shi bynta ban ïarap ïa ki khun samla kiba la ngat ha ki jingdih kiba sniew, ba lada ki kwah ban lait noh na ka, ka jingmareh ka long ka dawai ne ka bor mynsiem kaba lah ban loit ne ban law ïa u kynjri ba teh mraw ha ka kyiad ne ha u drok.
Ha kane ka jingïakren la wan ban don lang u rang ïa mareh bna nam ka jylla ba dang bat haduh mynta ïa ka rekod mareh ka ri u bah Benningstar Lyngkhoi ryngkat ki Pastor ka KJP Synod Sepngi bad ki dkhot ka SELDD.