Press "Enter" to skip to content

Ïakynduh mawsiang ka Tnad Agriculture ban pyntrei ïa ka APLM Act ba bun ki Bor Synshar

Shillong, Nailar 12: Ka Tnad Agriculture bad Horticulture ka Jylla, kala mad ïa shibun ki jingeh ha kaban pyntreikam ïa ka aiñ Agricultural Produce and Livestock Marketing (Promotion and Facilitation) Act, 2017 ha Jylla namar ka jingbun palat ki bor Synshar ban hap ban iatreilang.
Ka APLM act ka dei ka aiñ bala wanrah da ka Ministry of Agriculture jong ka Sorkar Pdeng ha u snem 2017 ban bujli ïa ka Agricultural Produce Market Committee Act, 2003. Ka Sorkar Pdeng haba wanrah ïa kane ka Aiñ thymmai, kala bthah ïa baroh ki Jylla ka Ri, ba kin pyntreikam ïa kane ka Aiñ bad ban pyrshang katba don ki lad ki lynti ha kaban lah pyntreikam thikna ïa ka na ka bynta ka bit ka biang jong ki paid Nongrep.
Kat kum kane ka Act, la kren shai ba ki Sorkar Jylla ki dei ban wanrah ïa ka jingkylla ha ka liang ka jingpynbiang ïa ka Iew ka Hat na ka bynta ki Nongrep ba kin die ïa ki marrep, ban thaw ïa ki Iew dielang jong ki riew shimet, ka Iew ban khaii beit beit hapdeng ki Nongrep bad ki Nongthied Nongpet (Farmers-Consumers Market) bad ka jingkhaii bym donkam ïaid pateng shuh (direct marketing)
Ka Aiñ ka ong ruh ba ym dei shuh buh kyndon a ka jingkhaii ïa ki jhur bad ki soh, ban don ka e-trading, ka jingoh khajna tang ha kawei ka Iew, ban ai kaei ka Trading Licence ha kaban khaii ha baroh kawei ka Jylla bad ban pynbna ïa ki Warehouse/ Cold Storage ba kin don lang ki jaka Iew khnang ba kin don bun ki Iew na ka bynta ki Nongrep.
Ka Jylla Meghalaya ka dei kawei na ki Jylla ka Ri, ki bym pat lah satia ban pyntreikam ïa ka APLM act bad ïa ka National Agriculture Market (e-NAM) kaba dei ka skhim jong ka Sorkar Pdeng kaba la wanrah na ka bynta ban kyntiew ïa ka ïoh ka kot jong ki Nongrep lyngba ka jingpynbiang ïa ki Iew ki Hat na ka bynta jongki.
Haba twad jingmut halor kane, ki Ophisar ka Tnad Agriculture kila ong “Ka Meghalaya ka shem jingeh ban pyntreikam ïa ka APLM act bad ka e-NAM namar ka jingdon bun palat ki bor synshar kiba hap ban pynsngewthuh ba kin iatreilang”. Ki ïathuh ba kine ki bor synshar ki kynthup naduh ki District Council, ki Dorbar Hima, ka Municipal bad kiwei kiwei.
Kat kum ka jingong jong ki, ka jingeh kala mih khamtam eh haba phai sha ka jingbuh kyndon haba ïadei bad ka jingsiew khajna kaba dei ban long noh tang shisien siew ha kaban khaii ha baroh kawei ka Jylla ym kumba ïaid mynta ba ki hap ban siew sha ki District Council, ki Hima bad kiwei kiwei.
“Ka Meghalaya ka don haduh lai tylli ki Autonomous District Council (ADC) nalor ki Dorbar Hima kiba bun..Ka long kaba eh ban pynsngewthuh bad ban ïoh ïa ka jingiatreilang halor ka jingsiew khajna jong ki nongrep, kaba dei ban long noh tang shisien siew” ong ki Ophisar ka Tnad rep haba ïathuh ba lada ïaid kat kum kane ka Aiñ, ki Nongkhaii na Khasi Hills kiba kwah khaii ruh sha Jaiñtia ne Garo Hills kim donkam shuh ban siew khajna sha ki ADC jong kine ki District ne ki Dorbar Hima.
Nalor ka jingsiew khajna, ki Ophisar ka Tnad kila pynpaw ruh ba ka jingeh haba ïadei bad ka APLM act ka dei halor ka jaka puta ban shna ïa ki Iew na ka bynta ki paid Nongrep ha kylleng ki jaka namar ka riti bat khyndew ba don hapoh ka Jylla.
Haba pynpaw ba ki Nongrep kim dei ban duh jingkyrmen, kine ki Ophisar kila ong “Ka Tnad mynta kala pynlong shaid shaid ïa ka jingia syllok bad ki kynhun bapher bapher (stakeholder) kynthup naduh ki ADC, ki Khlieh Nongsynshar bad kiwei kiwei khnang ban ïoh ïa ka jingiatreilang”.