Press "Enter" to skip to content

Ba shlei um ka surok 4-lane, sahkut ki samla pule ka Ri Bhoi College

Ïa kynduh lang u MLA, NTC bad Rangbah Shnong

Nongpoh,Nailar 13: Ki paidbah ka thain Nongpoh ki la hap ban mad ïa ka jingkynduh mawsiang na ka por sha ka porn a ka daw ka jingshlei um kaba la ktah jur ha ka thai Nongpoh bad ïa kane la sakhi ruh mynta ka sngi ha kaba ki khynnah pule ka Ri Bhoi College kim lah shuh ban leit sha ka College na ka daw ka jingshlei um hapoh ka surok 4-lane ba hap ha ka thaiñ Nongpoh.
Kane ka jingshlei um ka la ktah ruh ha Nongpoh, hadien ba u lapbah dang step phyrngap u la ther bun bun kynta bad tad haduh ba ka surok 4-lane ka shlei bad kaba la buh jingeh ïa ki paidbah nongeleit nognwan.
Kaba isangsot ka longba ki samla pule ka Ri Bhoi College na ka daw ka jingshlei um kim lait shuh ban leit sha ki College ba ka surok kaba ki hap ban jam na ka surok 4-lane la dap da ka um bad na ka bynta ban leit sha ka College la hap ban pyndonkam da ka Kali Bolero Pick up ban lait na ka jingshlei um kaba la ktah ha ka surokbah.
Kane ka jingshlei um ka la ktah ruh ym tang ïa ki samla pule kiba hap ban leit sha ki skul, hynrei na ka daw ka jingdap um ha ka surok ka la ktah ruh ïa ki khynnah skul, ki nongleit nongwan bad kumjuh ruh wat ki nongshong dukan haki jaka ba shah ktah na ka jingshlei um kum ha Pahamsyiem, Mawdiangum, Umlyngkdait bad kiwei kiwei ki bynta ba shah ktah ba hap hapoh ka sor Nongpoh.
Kum ban pynkynmaw, na ka liang ka Nongpoh Town Committee ka la shim khia ruh ban ia kren sha ka sorkar bad ruh wat sha ka National Highway Authority of India ba ka kan shim khia halor kane ka jingshah ktah ki paidbah na ka jingshlei um ha ki jaka ba hap hapoh ka thain Nongpoh bad ki la ai ruh wat ka jingthoh ba la dawa ba ka NHAI ka dei ban pynsted noh na ka bynta ban pynheh ïa ki Nala um bad kumjuh ruh ki jingkieng ïaid kjat ha kaba mynta kan shong sa ka rai ka NHAI ba kan ai ïa ka jingmynjur ban pynlait na kitei ki jingeh ba ki paidbah ki shah ktah na ka jingshlei um.
Halor kane ka bynta, na ka liang u MLA ka Nongpoh, ki nongïalam ka Nongpoh Town Committee bad ki Rangbah shnong hynnin ka sngi ki la pynlong ruh ka jingïlang ban ia kren bad pyrkhat halor kane ka kam, kaba dei na ka jingshah ktah ki paidbah halor ka jingshlei um kaba la jia na ka por shaka por tang shu wan u lapbah bad ka daw ba la lap tynrai ka dei ka jingbym biang ki Nala um bad ka jingbret pathar ki paidbah ïa ki jaboh ruh ka dei kawei na ka daw ka jingset ki nala kiba ktahsha ka jingshlei um.
Hadien ka jingïashong pyrkhat halor kane ka jingshei um ha ka jingïalang kaba la long ha ïing Dorbar Sajer, Nongpoh, u MLA ka Nongpoh, u Bah Mayral Born Syiem u la pynpaw ba un sa shim khia ïa kane ka kam bad ka NHAI bad ruh sha ka Sorkar jylla, ha kaba la kumno kumno ngi hap ban wad ïa ki lad ki lynti shi por ban lait na ka jingshlei um katba ka NHAI kam pat lah ban pynheh ïa ki Nala um ha ka surok 4-;lane ba ka Nongpoh Town Committee ka la dep ban iaid shakhmat ban dawa na ka NHAI ban pynheh noh ïa ki nala bad kiwei kiwei ki jingdonkam ba dang sahteng kum ka jingkieng iaid kjat ki paidbah kaba la donkam bha ha Nongpoh hadien ka jingwan jong ka surok 4-lane.