Press "Enter" to skip to content

Hakhmat u CM dawa ka HYC ban wanrah ïa u DC ba pura ha West Khasi Hills

Nongstoiñ, Nailar : Ka seng HYC West Khasi Hills District hapoh ka jingïalam jong u President samla Lumlang Kharsyiemlieh, ka la pynpaw hakhmat u Chief Minister ban wanrah noh ïa u Deputy Commissioner ba pura, namar ïa kane ka kam la shu bynshet ha u Bah K.L Nongbri la palat 3 bnai mynta.
U Bah K.L Nongbri ha ka jingshisha u dei u SDO jong ka Mawshynrut Civil Sub Division, hynrei la shu wanrah jubor sha District Head Quarter ban shim incharge kum u DC.
Na ka liang ka seng ka la pynpaw ïa ka jingeh hakhmat u CM namar ki paidbah naduh Mawshynrut ki shem shitom ban pyndep ïa ki kam jong ki tang na ka daw ba u SDO jong ki u la don pynban sha Nongstoiñ. Na ka bynta ki paidbah jong ka District baroh kawei, ka long kaba eh bha namar u Bah K.L Nongbri u la hap ban trei lut ki kam baroh bad kane ka don ka jingdkoh ha ki kam ki jam.
Ka seng ka la pynpaw ruh hakhmat u CM halor ka jingdonkam ban buh noh ïa ka Rehab Centre ha Nongstoiñ District Head Quarter. Ka la seng ka la pynpaw halor ka jingkynrei ki jingdih ba sniew bad bun ki samla ba dang khie dang san ki la ngop ha kine ki jingsniew. Kumta ka la donkam eh ban don ïa ka Rehab Centre.
Khatduh ka seng ka la pynkynmaw ruh hakhmat u CM halor ka jingdawa jong ka seng HYC Nongstoiñ Circle, ha kaba ïa dei bad ki kam pynroi ha Nongstoiñ District Head Quarter.
Na ka liang u CM haba jubab markhmat halor ka jingdawa ka seng, u la pynpaw ba un sa peit bad bishar bniah bad kular ruh ban shimkhia halor ki jingdonkam jong ka District. U la ong ba ka sorkar kaba mynta ka don ka jingangnud ban wanrah ïa ki jingkylla ha man la ki District ka Jylla. U la ong ba ka Nongstoiñ ruh ka don ha ka bynta kaba hakhmat eh ha ka jingïadei bad ki kam pynroi.