Press "Enter" to skip to content

1156 klur tyngka pyllait pisa ka Sorkar Pdeng sha ka NEC

Shillong: Ka sorkar pdeng, lynga ka Ministry of Development of North East Region (DoNER) kala mang ban pyllait pisa haduh1156 klur tyngka sha ka North Eastern Council(NEC) na ka bynta ban pyntreikam ia ki kam pynroi bapher bapher ha ka snem 2018-19.
Kane ka jingpyllait pisa kan long katkum ka jingpyntreikam ïa ki projek da kaba peit ruh katkum ka jingiaid ka kam bad ka jinglah ban submit ia ki Utilization Certificates. Na katei ka pisa la mang 250 klur tyngka na ka bynta ban shna ïa ki surok.
Ha kajuh ka por ïa ka Special Development Project jong ka NEC, la pynkylla noh sha ka skhim jong ka sorkar pdeng da kaba bei pisa beit na Delhi bad pynduh noh ïa ka
rukom bha pisa kumba long mynshuwa kaba long 90 percent na ka sorkar pdeng bad 10 percent na ka sorkar jylla.
Na ka liang ka NEC ka la kynthup lang ïa ki draft Guidelines ha ka jingialang ba 67 jong ka NEC kaba la long ha Shillong ha ka 9 bad 10 tarik u bnai baladep. Kine ki guideline ne ki kyndon ki ong ba ki projek kiba myntoi na ka bynta kane ka thaiñ, ki donkam ïa ka jingïatreilang ki tnad treikam jong ka sorkar pdeng da kaba shim na ka fund ba la ai sha ka NEC, ryngkat bad ka jingkyrshan pisa ka sorkar pdeg ha ka rukom kaba 60 percent na Delhi bad 40 percent na ki jylla.
Ki projek kiba la buh kham hakhmat ki long ka rep siej, ri sniang, kam shang pyrthei, ka pule puthi ha ki kyrdan ba kham halor, ka koit ka khiah, ki projek ba ïarap ïa ka jingïoh bam ba man ka sngi ki briew bad ka sian bad teknoloji. Halor kine la mang pisa 5.25 klur tyngka.