Press "Enter" to skip to content

Kular u CM ban pynïoh tulop ïa ki Nonghikai SSA, weng jingïakhih ka AMSSASTA

Shillong, Nailar, 18: Ka All Meghalaya SSA School Teachers Association (AMSSASTA) mynta ka sngi saitjaiñ ka la weng noh shipor ïa ka jingïakhih hadien ba u Conrad K. Sangma, Myntri Rangbah ka Jylla u la kular ban shimkhia ban pynïoh noh ïa ka tulop ba saw bnai jong ki nonghikai skul SSA ha ka jylla.
Kum ban shu kdew hangne, dang shen ki nonghikai SSA kiba don hapoh ka shatri jong ka AMSSASTA na rilum Khasi bad Jaiñtia bad ki nonghikai SSA na rilum Garo kiba don hapoh ka shatri jong ka All Garo Hills LP & UP SSA School Teachers Association (AGHSTA) ha ka jingïakynduh ba dang shen ha nongbah Shillong ki la shim ïa ka rai ban pynlong da ka jingsangeh leit hikai skul hadien ba ki la aipor haduh ka 20 tarik mynta u bnai ba Sorkar kan pyllait ïa ka tulop jong ki kaba saw bnai kynthih, kata naduh u bnai Ïaiong haduh Nailar mynta u snem.
Ka Seng ka la pynbna ban pynsdang naduh ka 21 tarik mynta u bnai da ki jingïakhih lada ka Sorkar Jylla kam lah ban tuklar lem halor ka jingbym ïoh tulop jong ki nonghikai Skul SSA kaba la neh haduh saw bnai kynthih.
“Ha ka jingshisha ngi la shim da ka rai ban pynlong ïa ka jingïashong kyllaiñ myngor (Sit-in Demonstration) ha baroh kai District ka Jylla bad 13 tarik mynta u bnai ngi la leit aiti da ka dorkhas sha ka Sorkar,” ong u Bah Lasforious Marngar, President ka All Meghalaya SSA School Teachers Association ha ka jingïakren bad ki lad pathai khubor mynta ka sngi saitjaiñ ha Shillong Press Club.
Haba ïathuh ba ka seng ka la leit pan jingpynshai na u Ambrose Ch Marak, State Project Director, u la ong, “u la pyntip sha ngi ba ka jingslem ban pyllait ïa ka tulop jong ki nonghikai SSA ka dei namar ba ka Project Approval Board jong ka Ministry of Human Resources Development ka la pynslem ban shim ïa ka rai.”
U ïathuh ruh ha ka jingïakynduh ïa u Conrad Sangma ha iing sah jong u dang shen, u Myntri Rangbah u la pyntip ba ka jingslem ban pyllait ïa kane ka tulop ba saw bnai ka dei namar ba u kyntait ban soi ïa ka Minute (jingthoh) jong ka PAB kaba la shim ïa ka rai ban khate noh ïa ka tulop jong ki nonghikai SSA.
“Na ka liang u Myntri Rangbah u la kyrpad ïa ngi ba ngin ïai shah bad ka Sorkar Jylla haduh mynta u bnai bad ong ruh ba lada kam urlong katkum ka jingaipor ngi lah ban shim da kano kano ka lynti jingïakhih,” ïathuh u Bah Marngar.
U la ïathuh, katkum ka jingïoh jingtip, ka PAB ka la rai ban khate noh ïa ka tulop ba ju siew sha ki nonghikai skul SSA, kata, T. 20,493 hajar sha ka T. 20,000 shi bnai na ka bynta ki Upper Primary bad T.19,044 hajar sha ka T.15,000 hajar shi bnai.
“Ngin sa wad jingtip da ka Right to Information na ka tnat Pule Puthi ka Sorkar Jylla ban ïoh ïa ka jingtip kaba shai halor kane ka jingshah khate noh ka tulop,” u la ong. Ha kajuh ka por u la ïathuh ba u State Project Director u la pyntip sha ki nongïalam ka Seng ba ïa kane ka pisa ba la shah khate yn hap ban siew na ka pla ïarong jong ka Sorkar Jylla.
Ki don haduh 12,481 hajar ngut ki nonghikai skul SSA ha ka jylla Meghalaya baroh kawei. Katkum ka jingpynbeit thymmai, ka Sorkar Jylla bad ka Sorkar Pdeng kin hap ban bei mar shiteng kata 50 % ka jingsiew tulop sha ki nonghikai SSA.
U la ïathuh ruh ba ka Seng kan dang ïai pynap ïa ki jingïakhih lada ka Sorkar kam lah ban siew noh mardor ïa ka tulop jong ki nonghikai.