Press "Enter" to skip to content

Kynduh DC ka HNYF halor ka Administrative Unit ha Patharkhmah

Nongpoh, Nailar, 18: Halor ka jingud ka jingnam ki paidbah ka thaiñ Western Ri Bhoi ba ym treikam ka Administrative Unit ha Patharkhmah, ka HNYF, Northern Region hynnin ka sngi ka la leit syndon ban kynduh ïa ka Deputy Commissioner ban ïa kren halor ka jingdonkam ban treikam katei ka Administrative Unit na ka bynta ka jingmyntoi ki paidbah.
Ha kane ka jingleit kynduh ïa ka DC, ka Kong R.M Kurbah la ïalam da u Bah Donroy Kshiar, Assistant General Secretary ka HNYF, Northern Region bad ryngkat ki dkhot bad kum ka seng ka la pynpaw ka jingkmen ba ki la lah ban kynduh ïa ka DC ban pynsngew halor ki jingdonkam ban pynbiang ïa katei ka Administrative Unit.
Haba ïa kren bad ki Nongthoh khubor, u Bah Donroy Kshiar, Assistant Secretary ka HNYF, u la ong ba ka seng ka la leit kynduh DC na ka bynta ban pynsngew halor kajingeh ki paidbah kaba dei na ka daw ka jingbym treikam bha ka Administrative Unit bad ka long pat kaei kaei kaba sngewkmen ba ka DC ka la kular ban shim khia na ka bynta ban pynsuk ïa ka jingdonkam jong ki paidbah.
Ha kawei ka bynta, u laong ruh ba ka HNYF ka kyrshan ban pynioh Civil Sub Division ha Patharkhmah bad katba katei ka Civil Sub Division kam pat urlong ka seng ka kyntu ruh ïa ka DC ba kan pynthikna kumba ka la kular ba ha kitei ki sngi ki ophisar ki dei ban don ha ophis na ka bynta ka jingdonkam jong ki paidbah, u la bynrap.