Press "Enter" to skip to content

Kyrpad u Bah John ia u CEM ban thung Sub-Committee ban stet ki Act bad Rule ki Hima Khasi

Shillong, Nailar, 18: U Bah John Kharshaiing, Chairman ka Dorbar ki Khlieh Nongsynshar u la kyntu ia ka Executive Committee jong ka KHADC ban thung kyrkieh da ki Sub-Committee ban khlieh da ki MDC na ki Hima ne Elaka ryngkat ki muktiar na High Court, Supreme Court na ka bynta ban pyndep ia ki Act, ki Rule jong ki Hima, Elaka bad buh por ruh ban pyndep ia ki draft Bill ryngkat ki jingai jingmut hapoh ar bnai.
Utei u rangbah u la ai jingmut ruh ia ka KHADC ba lada lah ban pyndep ia kitei ki jingai jingmut hapoh 60 sngi kin ioh ban rah sha Council ban mynjur bad ban phah sha u Lat ban pynskhem ia kitei ki Act bad ki Rule hapoh u Naiwieng mynta u snem ha shwa ban kut ka samoi treikam jong ki MDC.
Na ka liang u Bah John u la kdew ruh ba ki Hima Khasi ki bym pat don ia ki Act bad ki Rule ki bun bha, kata kynthup nadudh ka Khyriem Syiemship, Sohra Syiemship, Nongspung Syiemship, Mawsynram Syiemship, Mawphlang Lyngdohship, Sohiong Lyngdohship, Lyngiong Lyngdohship, Mawdon Sirdarship, Dwara Nongtyrnem Sirdarship, Nonglwai Sirdarship.
U la ong ruh ba ki Elaka Sirdarship ki bym don Act bad Rule ki long Mawbeh Larkhar Sirdarship, Laitkroh Sirdarship, Laitlyngkot Sirdarship, Marbisu Sirdarship, Saitsopen Sirdarship, Synnei Sirdarship, Sohbar Sirdarship, Tyrna Sirdarship, Umniuh-Tmar Sirdarship, Mawmluh Sirdarship, Wahlong Sirdarship. Shuh shuh u la iathuh ba ki don ki Hima ne Elaka ki ba don tang ka Act kum ka Hima Nongkhlaw kaba don ka Act kaba naduh u snem 1997 kaba tang san sla bad tang hynriew tylli ki Section bad haduh kine ki sngi ki bor KHADC kim
pat pyndep ia ka Amendment kaba la phah na ka Hima Nongkhlaw Syiemship.
U ong ruh ba ki don ki Hima ne Elaka kiba la phah ia la ki Riti Dustur sha ki bor KHADC kum ka Hima Sohra, Mawdon, Nongspung ter ter hynrei kitei ki Act ki dang iai sah kut.
“Kiba bun ki Act ki Rule ba la pynskhem ki bor KHADC kim shai namar kumba paw ki Riti ki Dustur ki tyngkhuh bad kiba bun ki Aiñ jong ka Parliament ha kiba bun ki liang. Ngi kyrpad rit ia ki 29 ngut ki MDC KHADC ban shim khia ban pyndep, pynskhem, pynjanai ia ki Act ki Rule jong ki Hima bad Elaka la jong namar ha ka 17 tarik Nailar, 2018 kan dap 70 snem ka jingsoi bad jingrung India da ki kyndon ki Hima arphew san Khasi States lyngba ka Instrument of Accession bad Annexed Agreement 17 August 1948,” u la ong da kaba bynrap ba haduh kine ki sngi ka Sorkar India kam pat pyntrei kam ia la ki jingkular ban pynpaw ia katei ka dulir hapoh ka Constitution Ri India, katkum ka First Schedule, bad pynban ka la pynrung jubor ia ki Hima Khasi States hapoh ka Sixth Schedule ha kaba kiba la shah jied kum ki MDC ruh kim shym lah ban pyndep ia kitei ki bynta ban pruid dak ia ki Riti Dustur jong baroh ki 54 Hima/Elaka hapoh ka Sixth Schedule wat hadien 66 snem (1952-2018).
Kumta, u la kyntu jur ia ka Executive Committee, KHADC ban thaw ki lad ki lynti ban pynurlong ia kitei ki jingthmu pynkup bor ia ki paidbah ha shuwa ban poi ka samoi elekshon MDC 2019.
Ha kajuh ka por u la ong ruh ba u sngewkhia halor ka jingdonkam ban pynkup bor ia u khun u hajar na ka daw ka jingsahkut teng ka aiñ Dorbar Kur ( The KHADC (Khasi Social Custom of Lineage) (First & Second Amendment) Bill 2015/2018, Dorbar Shnong (Ka KHAD (Village Administration Bill) 2014, Dorbar Raid ( da ki phew tylli ki Raid kim pat don ia ka Act bad Rule) bad Dorbar Hima ( kumba palat 30 tylli ki Hima/Elaka kim pat don Act bad Rule).