Press "Enter" to skip to content

Plie u MLA ïa ka Sales of Work cum Food Fest ka Phudmuri Presbyterian HSS

Shillong, Nailar : Kum shi bynta ban pynmih pisa na ka bynta ka Jubili Rupa ba ka Phudmuri Presbyterian Higher Secondary School ka thmu ban rakhe ha u snem 2019 bad ban pynkut ha u snem 2020, u MLA bad u MDC ka Mawlai constituency u Bah PT Sawkmie hynne ka sngi u la khap ïa u ribon plie ïa ka Sales of Work cum Food Fest ba la pynlong hapoh kane hi ka skul kaba don ha Mawlai Phudmuri.
Ka la long ka sngi kaba kmen na ka bynta ki nong pynïaid jong ka skul, da ka jingdon ryngkat jong i kurim jong u MLA, iba la synran lang ïa i ha kane ka sngi, u pastor M.Nongsiej, uba long u chairman bad u president ka Managing Committee (MC) jong ka skul, ki dkhot ka Mawlai Mahila Block Congress, ba la ïalam da ka Kong Golda Pathaw, ki nongïalam bad ki dkhot na ka Mawlai Constituency Progressive Forum (MCPF), ka principal jong ka skul ka Kong P Rynjah, ki nonghikai, ki kmie ki kpa bad ki nonghikai.
Haba ai jingkren kum u kongsan u Bah PT Sawkmie u la pynpaw ba u dap da ka jingkmen ba u don bynta lang ha kane ka jingthmu ka MC ban jam shakhmat ha kaban rakhe ïa ka Jubili Rupa kaban dap 25 snem ha u 2020, kaban sdang rakhe baroh shisnem naduh u 2019 haduh u snem 2020. Ula ong ruh ba U Blei un ym iehnoh ïa kane ka skul bad ïa ki nongpyniaid kumjuh halor kane ka jingthmu ba bha jong ka skul.
U pynpaw ruh ba u ïa kmen lang haba u ïohsngew ba ka skul ka la lah ban plie ïa ka klass 11 bad 12. “Ngi khmih lynti ruh ba kane ka skul kan ïaineh ban don ïa ka Discipline, la ka dei ha ka jinglong, ka akor bad ka jingïatylli kum ka skul, khnang ba ka skul kan nangkham paw bad ba kin lah khring shuh ia ki khynnah sha kane ka skul,” bynrap u Bah Sawkmie.
Shuh shuh ula ong ruh ba ki skul ha Mawlai constituency ki la bun bha bad kum u nongmihkhmat un pyrshang katba lah ban ïarap lang ïa baroh khlem da noh shiliang ïano ïano na ka bynta ban kyntiew ïa ki skul hapoh Mawlai.”
Haba kren pdiang sngewbha ka Kong P Rynjah, principal ka skul ka la pynpaw ba ki don baroh 18 tylli ki stall ba ki la buh na ka bynta ban pynïaid ïew ia ki tiar ba har rukom, kiba kynthup ia ki dukan ja, dukan jhur, dukan die syntiew, dukan die mula, prah bad kiwei.