Press "Enter" to skip to content

Pynkhreh ka Kong Mebarisha ban aireng ïa ka Mrs. Asia Tourism ha Phillipines

Shillong, Nailar, 18: Ka Kong Mebarisha Sohphoh, ka longkmie kaba la ïoh rah ïa ka kyrdan 1st Runners Up ha ka jingïakob Miss and Mrs India International Global, 2018 bad ïohrah ruh ïa ka nam Sub Title kum ka Mrs Talented, kaba la long dang shen ha sorbah Guwahati, ka la pynkhreh mynta ïalade ban leit aireng pat sa ha ka jingïakop Mrs Asia Tourism International Global, 2018 ka ban sa long ka ri Philippines ha ki bnai ban wan.
Kum ban shu kdew hangne, ka jingïakob ïa ka Miss bad Mrs India International Global, 2018 ha sorbah Guwahati ka la long ha ka 12 tarik mynta u bnai bad ka Kong Mebarisha Sohphoh ka la ïohrah ïa katei ka nam ha katei ka jingïakhun bad ka dei ruh ka longkmie kaba la ïashim bynta ha ka Mrs Ri-Bhoi, 2017 bad rah ïa ka nam ha katei ka jingïakob bad hadien kata ka la shim bynta sa ha ka jingïakob Mrs Glamour India, 2017 bad ïoh ïa ka nam 2nd Runners Up.
Ka Kong Mebarisha ka dei kaba shong ba sah ha ka shnong Umsamlem, Ri-Bhoi district,
Umsning bad ka dei ka khun jong ka Kong Fabiola Sohphoh bad ka kurim jong u Bah Paulus Shadap.
Kum ka nongjop watla kam shym la ïohrah ïa ka nam lahduh ha ka Mrs India International Global, 2018 hynrei ka la ai ïa ka jingkhublei bad sngewnguh nyngkong eh ïa u Blei, ïa la ka kmie ba kha ba pun, ka Kong Fabiola Sohphoh, ïa la u kurim u Bah Paulus Shadap, ïa la ka hynmen ka Kong Aitihun Sohphoh, kiba long ka kti kamon ha baroh ki liang.
Kane ka longkmie ka la ai khublei ruh ïa ka Women Organisation ka Ri-Bhoi district, ïa ki paralok kynthup ïa ka Kong Sunita Lamare, ka Kong Annette Lyngdoh kiba la synran lang ha ki lynti ïaid, ïa u nongpynwan dur (designer) kata u Bah Wanphrang Kharbuli, ïa ka Director ka Miss and Misses India International Global, 2018 ka Nupur Saigal bad ïa baroh kawei ka kynhun kaba la trei shitom ban pynbit pynbiang ïa baroh ki nongshim bynta bad kiba la ailad ïa ki longkmie ban pyni ïa ka sap ba ki don.