Press "Enter" to skip to content

Thaw ka Sorkar da ka Komiti ban pynrung kam ïa ki briew ba duna dkhotmet

Shillong, Nailar, 18: Ka Sorkar Jylla dang shen ka la thaw da ka Komiti ka ban peit ïa ka jingpynrungkam ïa ki briew kiba duna dkhotmet ha ki shnat treikam bapher bapher ka Sorkar Jylla kum ka jingpyntreikam ïa ka bhah thungkam kaba 4 % kaba la kdew katkum ka aiñ Peoples with Disability Act, 2016 ba la mynjur da ka Sorkar Pdeng.
Ïa kane la pyntip da ka Kong C. Kharkongor, Commissioner for Persons with Disabilities haba kren kum ka Kongsan ha ka jingai jingtip halor ki hok jong ki briew kiba duna dkhotmet ha ka jingïalang kaba la long mynta ka sngi saitjaiñ ha Khasi National Dorbar Hall, Shillong.
Ka Kong Kharkongor, ka la ïathuh ruh kane ka Komiti kan hap ban shong bishar ban jied ïa ki briew kiba dei hok ban ïoh rungkam ha ki shnat treikam ka Sorkar bad mynta ka komiti ka dang ap ïa ka jingpynbna (notification) na ka Sorkar Jylla.
“Ïai shah shitom bad ngi bad lehse la kumno kumno hadien phra bnai eiei ngin sa lah ban pyllait ïa ka thup kyrteng,” ong ka Kong Kharkongor.
Ha kajuh ka por ka la ïathuh ba ka Sorkar Pdeng ka la sam ruh ïa ki Universal Disabilities Identity Card (UDID) sha ki briew kiba duna dkhotmet.
“Phi lah ban ïoh ïa ka UDID na ki DDRC bad SRC ba ka Sorkar ka la buh ha ki Civil Hospital ha Shillong, Nongstoiñ, Tura, Jowai bad ha Ri-Bhoi,” ka la ong.
Ka la kyntu ruh ïa ki nongïalam ka Khasi Disabilities Association (KDA) ba kan lum ïa ka kyrteng bad ki jaka sah bapura jong ki briew kiba duna dkhotmet ha ka jylla ban aiti sha ka District Management Authority (DMA) khnang ba kin dup lah ban ai jingïarap haba wan kino kino ki jingshah lynshop ha ki bor mariang.
Haba batai ruh ïa ki hok ba la pynkup bor da ka PWD Act, 2016 ïa ki briew ba don jingduna ha ki dkhotmet, ka Kong Kharkongor, la batai bniah ïa ki hok halor ka pule puthi, ka ïohkam ïohjam, ka koit ka khiah bad kiwei kiwei.
Ka la ong ba katkum kane ka aiñ, ka Sorkar Pdeng ka la pynrung ruh ïa ki briew kiba ïoh ïa ka jingpang Austism ha ka thup jong kiba duna dkhotmet.
Ka la pynshai ruh katkum ka Section 6, ka kdew shai ba la khang ban pynlong ïa ki briew kiba duna dkhotmet kum ki tiar ba ki briew ki donkam ban leh ïa ka jingwadbniah khlem ka jingmynjur jong kiba duna dkhotmet.
“Ngi don ïa ka Committee of Research kaba la khlieh da u Director of Health Services (DHS) bad lada don kino kino ki briew ne ki kynhun ba kwah ban wad ïa ki jingtip kiba bniah shaphang ki briew ba duna dkhotmet ki dei ban da ïoh jingbit na kane ka Komiti,” la ong ka Kong Kharkongor.
Ha kane ka jingai jingtip halor ka hok ki briew ba duna dkhotmet la ïoh jingkren ruh na u Bah Starwin Kharjana, President ka Khasi Disabilities Association, na u Samla Decided Rynghang, u samla ba dang shu pyndep ïa ka jingpule Aiñ bad kiwei kiwei.