Press "Enter" to skip to content

Halor ka ishu nongrep yn ïakhun elekshon MDC u kyrtong Congress na Laitumkhrah

Shillong, Nailar 22 : U kyrtong MDC ka Congress na Laitumkhrah, Bah Fantin Joseph Lakadong ba dei ruh u kurim ka MLA na ka thaiñ, Dr. Ampareen Lyngdoh u la ong ba ka jingmih jong u ban ia khun ïa ka elekshon MDC kadei beit da ka thong ban ia khun na ka bynta ka jingeh jong ki nongrep ha katei ka constituency.
“Ka thong ba hakhmat eh jongnga ka long ban kyrshan bad plie lad plie lynti lem ïa ki nongrep kiba don ha ka constituency. Kum u MDC ryngkat ka jingtrei lang bad ka MLA, ngi don ka thong ban pyntikna ba ki nongrep kin ym shah khñiot beiñ,” u la ong.
Katkum ka jingïathuh jong u, tang ha ka constituency ki la don haduh kumba 35 persen ei ei ki nongshong shnong kiba pyndap ïa ka iing ka sem bad pynnang pynstad ïa ki khun tang da ka kam rep.
Nalorkata, u la pynpaw ruh ba ha kine ki khyndiat bnai ba u ïoh ban kynduh ïa ki paidbah ha kylleng ki shnong, u ïohi da la ki jongki khmat ba ki nongrep ki kynduh bun bha ki jingeh bad kumta lada ym don ba plie lad plie lynti ïa ki, kin iai bteng ban neh ha ka jingduk jingkyrduh.
Ha kajuh ka por u ong ruh ba u kwah ruh ba ha KHADC ruh dei ban don noh ka aiñ ban khanglad kyntiap seng. “Ka jingpynjop jong ki paidbah bunsien kadei na ka party ba ki don, kumta kam long kaba itynnad lada tang mar ia jop pat kin kyntiat noh sha kawei pat ka seng,” u la ong.
Utei u rangbah ba dei ruh u Working President jong ka Block Congress, u la ïathuh ruh kum u nongmihkhmat u kwah ban pyni khambun ka kam bad duna ka ktien kaba dei ruh ka rukom treikam jong ka MLA ka thaiñ bad kurim jong u, ka bym ju put bikur haba ka leh ïa kano kano ka kam na ka bynta ka bha ka miat jong ka imlang sahlang.
Lah ban kdew hangne ba ka Laitumkhrah Block Congress Committee (LBCC) da kawei ka sur ka la tyrwa da ka kyrteng jong u Bah Fantin Joseph Lakadong uba dei ruh u kurim jong ka MLA Shillong East, Dr. M Ampareen Lyngdoh, ban long u kyrtong ka party ha kane ka elekshon MDC kaban sa long shen.
Ïa katei ka rai, ka Congress Laitumkhrah ka la shim ha ka jingialang jong ka party kaba long ha ka 11tarik mynta u bnai.
Haba iakren bad u Bah Fantin u la ïathuh ba kum u briew uba la don bynta ban iarap paidbah khlem da put turoi ialade naduh ki 10 snem mynshwa, u pynpaw ba lada u jop kum u MDC un pyrshang ban ai ka jingshakri kaba kham paka bad janai ïa ki nongshong shnong ka constituency.
Na ka liang ka MLA pat ka la ïathuh ba ïa ka kyrteng jong u Bah Fantin shen kin sa phah noh sha ka District Congress Committee khnang ban ïoh ïa ka jingmynjur.