Press "Enter" to skip to content

Hiar u BDO sha Langpih ban pynbeit ïa ka skhim shispah sngi

Nongstoiñ, Nailar 22 : Ha ka sngi Hatmajai u BDO ka Mawshynrut Block, Bah T.Diengan ryngkat ki Gramsevak ki la hiar sha ka shnong Langpih ban pynbeit ïa ka kynrum kynram halor ka jingpyntrei ïa ka skim shispah sngi (MNREGS).
La kynnoh ba ka jingmih ki kynrum kynram kadei namar ki don katto katne ki rangbah ki bym kwah ban ïatreilang bad u sordar ka shnong Langpih lem bad ki nongpynïaid jong ka PEC bad VEC kaba la thung ha ki snem ba mynshuwa.
Ha katei ka jing leit jong u BDO ha katei ka shnong la ong ba la dep phah da ka shithi ban pyntip sha u Bah Swingly Samakha Sordar shnong Langpih ba un pyntip sha ki paidbah shnong bad la pyntip ruh da ka shithi sha u Bah Dominik Wahlang u sordar jong ka shnong Langpih uba la thung da u Acting Syiem ka Hima Nongmynsaw ba un ïa don lang ha katei ka sngi. Na ka liang kitei ki arngut ki rangbah ryngkat bad ki paidbah ki la ïa don ryngkat bad kynthei bad shynrang naduh ki samla ruh.
Hadien ba u BDO u la poi nyngkong eh u la pan jingshai na kitei ki arngut ki rangbah la ki sngew don kam ne em ban dang pyntrei biang ïa ka MNREGS ha katei ka shnong. Na ka liang u Bah Samakha sordar ka
shnong Langpih u la pynshai ba ka jing pyntrei ne ka jingbym pyntrei ka shong ha ka jingkwah jong ki paidbah namar na ka liang jong u um kwah ba kano kano ka jingïapher jingmut kan mih hapdeng ki riew rangbah hynrei u da kwah eh ban ïatylli lang kawei ha baroh ki kam khnang ba kin ym shah peit khmat ha ki mynder kiba don ha katei ka thaiñ.
Na ka liang u bah Dominik Wahlang pat u la jubab tang shikyntien da kaba ong ba um kwah ban ïatrei lang. Hadien ka jingïatai kaba slem bha na ka liang u BDO u la pynshai ban a ka liang ka ka ophis jong u kim shym la wan ban pynbeit ïa ka synshar shnong ne synshar hima hynrei ki la wan tang na ka bynta kawei ka jingthmu bad kata ka long na ka bynta ka jing myntoi jong ki paidbah nongshong shnong na ka jing trei bylla shispah sngi.
Haba utei u BDO u la pan jingshai na ki paidbah la ki kwah ne em ba kin ïoh bylla shispah sngi na ka liang ki paidbah baroh ki la pynpaw ba ki kwah. Nalor kata kaba kham sngew tynnad ka long ba wat la ki don katto katne ngut ki bym kwah ia ka jingïatrei lang ban wanrah ïa ka roi ka par bad ban kyntiew ïa ka ïoh ka kot lyngba ka skhim shispah sngi hynrei na ka liang ki paidbah kim shah satia ba kitei ki bym kwah kin pynthut ne khanglad ban pyntrei ïa katei ka skhim.
Khatduh eh da ka jingmynjur lang jong baroh ki paidbah la thung ïa ka PEC bad ka VEC bad la jied ruh ïa ki nongkitkam bad ki dkhot jong kitei ki Komiti bad kitei ki artylli ki Komiti kin sdang noh shen ban trei kam bad ban pynïaid shaphrang ïa ki jingtreikat kum ka jing don kam jong ki paidbah nongshong shnong bad na ka liang u BDO u la kyntu ïa ki nong kit kam jong kitei ki Komiti ba kin wan mih kham kloi ha poh ka ophis jong u na ka bynta ban pynbeit ïa ki jingtrei kab dei ban sdang noh ha u bnai ban wan.