Press "Enter" to skip to content

Kynnoh ka KHADC ïa ki Rangbah Shnong halor ka jingai Trading Licence: HNYF

Shillong, Nailar 22 : Ka HNYF Shillong Region ha ka sngi Balang ka la kynnoh ba ka KHADC lyngba ka tnad Trade ka la kynnoh kylla ïa ki Rangbah Shnong halor ka jingai Trading Licence sha ki bym dei ki Khasi khamtam ïa ki bar jylla ban leh ïa ka khaïi pateng ha u pud u sam jong ka Council.
Haba kren bad ki lad pathai khubor, u General Secretary ka Seng, Bah Faster Kharmujai u la ong ba ha ka jingiakynduh ïa u Executive Member ka tnad Trade, Bah Antonio War ha ka sngi Hatmajai u la ong ba ka KHADC kam donbor ei ei ban tuklar halor katei ka bynta.
“U EM u la ïathuh ba ka District Council ka shu mynjur bad pdiang beit ïa kaei kaba ki Rangbah Shnong ki la dep ban ai jingbit ne ai ïa ka No Objection Certificate,” la ïathuh utei u nongïalam ka HNYF. Na ka liang ka Seng ka ong ruh ba kim lah satia ban pdiang ïa katei ka jingong jong u Executive Member ban thet kti ba ka Council kam donbor.
“Ha ka jingshisha ka Clause D jong ka aiñ ka kdew shai ba ïa ki Trading Licence lah ban ai tang sha ki nongshong shnong ba pura jong ka Distrik. Kumta ka long kaba donkam ba ka KHADC kan pynshisha ïa ka jaka shong jaka sah jong kitei ki bar jylla ha shwa ba kan ai ïa ki license,” la bynrap biang.
Ym tang katta, la ong ruh ba ha ka dorkhas ki la pynpaw ba ka Executive Committee ka don ka bor ban kyntait ai ïa ka Trading Licence sha ki bar jylla lada ka lap ba ka jingdon ki nongkhaïi bym dei Khasi ka la tam ïa kaei ba ka EC ka buh.
Ka HNYF ka pynpaw ruh ka jinglyngoh halor ka jingkyntait jong utei u EM ïa ka jingtyrwa ka seng ban leit khynra Trading Licence. “La katta ïa kane ka kam ngin hap ban iaid shakhmat,” u la ong da kaba bynrap ba katkum ki kyndon teikam jong ka KHADC kaba iadei bad ka Trade ka la kdew shai ba ka Council kam dei shuh ban ai Trading Licence sha ki bar jylla ïa ki kam kiba la lah ban trei da ki Khasi.
Ha kajuh ka por kaseng ka la kyntu ïa ki Dorbar Shnong ba kim dei satia ban shu ai NOC pathar sha ki bym dei Khasi na ka bynta ka Trading Licence.