Press "Enter" to skip to content

Mynta yn thep vote ha ka Bye-Election Ranikor bad South Tura

Mang ka Sorkar ban pynlut T. 1.6 klur

Shillong, Nailar 22: Mynta ka sngi ki paidbah nongthep vote jong ka Ranikor bad South Tura Constituency, kin ïathep vote sa shisien na ka bynta ka elekshon MLA shiteng samoi ban jied ïa ki nongmihkhmat ba thymmai sha ka Ïingdorbar Thaw Aiñ ka Jylla.
Ka jingïathep vote kan sdang naduh ka por 7 baje mynstep haduh ka por 5 baje janmiet bad ka jingniew ïa ki vote kan long ha ka 27 tarik Nailar.
Ïa kane ka elekshon MLA shiteng samoi la pynlong hadien ka jingiehnohkam u MLA bala mihkhmat la san samoi ïa ka Ranikor u Martin M Danggo myn ha ka 21 tarik Jylliew bad ka Agatha K Sangma myn ha ka 2 tarik Naitung ban plie lynti ïa u hynmen u Conrad K Sangma ba un dang ïoh bteng ïa ka jinglong Myntri Rangbah ka Jylla.
U Conrad Kongkal Sangma, President ba hakhlieh duh ka National Peoples Party (NPP) bad uba dang long MP ka Tura mynta, un hap ïa aireng pyrshah ïa kyrtong ka Congress Charlotte M Momin bad u MLA barim u John Leslee K Sangma bad u Chris Kabul A Sangma, ki ban aireng kum ki kyrtong shimet.
U Conrad ula bam smai kum u Myntri Rangbah ka Jylla ha ka 6 tarik u Lber. Ka NPP ka dei ka Party kaba ïalam ïa ka Sorkar syn rop jong ki 6 tylli ki seng saiñ pyrthei bala jer kyrteng da ka Meghalaya Democratic Alliance (MDA).
Ha Ranikor kaba hap hapoh ka South West Khasi Hills District, u Martin M Danggo jong ka NPP un hap aireng pyrshah ïa u kyrtong ka UDP u Bah Pius Marweiñ, u Chairman ka PDF Bah Pynshngaiñ N Syiem bad u kyrtong ka Congress u Jackiush Sangma.
U Chief Electoral Officer ka Jylla Bah Frederick K Kharkongor ula ong ba ka jingpynkhreh kala biang lut nadong hadong ha kaban lah pynlong ïa ka elekshon kaba khuid bad ba jop ha baroh artylli ki Constituency.
“Na ka bynta ka Ranikor kaba dei ka thaiñ ba sha kyndong bad kaba don ha khappud ka Bangladesh, ki kynhun ban pynïaid ïa ka elekshon ha ki 31 tylli ki Polling Station la phah hynnin ka sngi” ong u Bah Kharkongor.
Ka South Tura Constituency ka don haduh 30,231 ngut ki Nongthep vote ba kynthup ïa 14,846 ngut ki shynrang bad 15,351 ki kynthei, 33 ki service voters bad uwei u NRI ha ki 36 tylli ki Polling Station. Ka Matchokolgre ka dei ka Polling Station kaba heh duh bad don 1337 ngut ki Nongthep vote katba ka Lepe Colony ka dei kaba rit eh ba don tang 151 ngut ki nongthep vote.
Ka Ranikor Constituency ka don 65 tylli ki Polling Station bad haduh 29,685 ngut ki Nongthep vote ba kynthup ïa 15183 ngut ki shynrang bad 14487 ngut ki kynthei. Napdeng kine, ka Rangthong Polling Station ka dei kaba heh duh kaba don 817 ngut ki nong thep vote bad ka Nongbahjynrin-Mawthabah ka dei kaba rit duh ba don tang 12 ngut ki Nongthep Vote.
Lah ban kdew hangne ba ka jingpoi jong ki nongthep vote jong ka South Tura Constituency ha ka elekshon ba long myn ha ka 27 tarik Rymphang ka kot haduh 73.59% katba ka Ranikor ka kot 89.5%.
Na ka liang ka tnad Elekshon kala pynkhlaiñ bha ïa ki bor pahara ha baroh kine ki Constituency khnang ban pynthikna ba ka jingïathep vote kan long kaba ïaid beit ïaid ryntih. Haduh 4 pyrton ki bor pahara la phah sha kine ki Constituency ba kin peitngor ïa ka jingïaid beit ka elekshon.
Haba iadei bad ka jingpynlut ha kine ki artylli ki elekshon, ka Sorkar kala mang pisa haduh T.1.6 klur ha kaba la phiah mar T.80 lak sha baroh artylli ki Constituency kata na ka bynta ka Ranikor bad ka South Tura.
Dawa ka KJBWA ïa ka Sorkar