Press "Enter" to skip to content

Na ka rynsan Ri Bhoi Super Talent show ba la jam sha ka top 40

Paw pyrthei ki sap ki phong ki samla

Nongpoh, Nailar 22: Ka rynsan ban sei ïa ki riew donsap hapoh ka them Ri Bhoi kaba la tip kum ka ‘Ri Bhoi Super Talent Show’ ka la long kaba shongshit bad ïoh mynsiem shibun hadien ba u MLA ka Nongpoh Constituency u Bah Mayral Born Syiem u la wan ban sakhi ha kane ka sngi ryngkat ka jingïadonlang jong u Bah Michael Kharhunai uba long uwei na ki Riew rangbah uba ju kyrshan ïa kiba donkam ki jingïarap nangta la ïadonlang ruh u Bah Plielad Tiewsoh, u Bah Bull Lyngdoh bad kiwei kiwei.
Kane ka jingïoh mynsiem ki samla ban sei ïa la ki sap ki phong ka dei ruh ha ka Mega Audition ba la pynlong da ka Ri Bhoi Entertaintment ba la tipkum ka Ri Bhoi Super Talent Show kaba la pynlong ha ka 18 tariku Nailar ha ïing Dorbar, Sajer ha Nongpoh.
Kum ban shu pynpaw hangne hadien ba ki nongïalam jong ka Ri Bhoi Entertainment ki la leit ban pynlong ïa ki Audition ha kylleng ki thain jong ka Ri Bhoi District kiba kynthup ïaka Byrnihat, Nongpoh, Umsning, Bhoirymbong, Umden bad Patharkhmah, bad ha kane ka kynti kaba mynta pat la wanrah lang ïa baroh kiba la shahjied na ki audition ha kajuh ka jaka ha kane ka sngi bad la jied ïa ki nongïashim bynta ki ban rung sha ka Top 40 ki ban hap ban ïakhun pat sa haka Round Top 40 kaba long ka Semi Final ka ban sa pynlong haka 22 tarik u Nailur 2018 ha Umsning.
Na ka liang u MLA Bah Mayral Born Syiem bad u Bah Michael Kharhunai ryngkat kiwei ki riewrangbah kiba la ïa don lang ha kane ka sngi ki la pynpaw ïaka jingsngewkmen haba ki khun samla jong ka Dong ki la lah ban pynlong ïa kiba kum kine ki jait rynsan kaba long ka lad na ka bynta kiwei pat ki khun samla ban ïoh sei ïa la ki sap lyngba kane ka rynsan. Na ka liang jong kine ki riew rangbah ki la noh ruh ïa ki song jingïarap sha ka Ri Bhoi Entertainment kaba long kum ka jingkyrshan bad kyrkhu kyrdoh ïaki nongpynïaid ba kin dang lah ban jam shaphrang na ka bynta ban sei ïa shibun ki sap ki phong jong ki khun samla ka District.
Ha kane ka Show ki Nongbishar ki kynthup ïa u Bah JI Sun uba long uwei na ki Nongrwai ba la rim bha napoh ka Dong Ri Bhoi, I Aktres Wanri Pyngrope iba dei iwei na ki aktres bna nam jong ki phlim Khasi ha Meghalaya, iba la ak ha ka phlim Ha nga marwei, Haban Tony bad ka phlim ka ban sa pynmih mynta kaba kyrteng ka 9-Lad bad u Samla Standwell Manih uba long uwei na ki nongrwai ba dang thymmai bad sdang kiewbha ha ki kam rwai napoh Ri Bhoi.
Lyngba jong kane ka sngi, nalor jong ka jingtbit jong ki nongïashimbynta ban pyni ïa la ki sap la pynshongshit bad pynsngewtynnad ruh ïa ki paidbah nongpeitkai da u bah Rijied Khymdeit uba long u Anchor jong kane ka Show.
Shuh shuh na ka liang jong ki nongïalam jong ka Ri Bhoi Entertainment ki la pynpaw ïaka jingkhublei sha baroh kiba la donkti ban noh synniang sha ka Committee ha kaba la lah ban pynïaid bad pyntyllun bha ïaki kam baroh. ki la pynbna ruh ba ka Semi Final kan long haka 22nd September 2018 ha Umsning.