Press "Enter" to skip to content

Na u CM Meghalaya pan nongtrei ka AIMA ban tei thymmai biang ïa ka Kerala

Shillong, Nailur 22 : Ka All India Malayalee Association (AIMA), Meghalaya Unit ha ka 20 tarik mynta u bnai ka la kyrpad ïa u Myntri Rangbah ka Jylla, Conrad K Sangma ban pan nongtrei na ka bynta ban tei thymmai biang pat ïa ka Jylla Kerala kaba la shah syllad jur ha ka jingshlei um ha kine ki khyndiat sngi ba la dep.
“Ha ka dorkhas sha u Myntri Rangbah ngi la pyntip ba ngi donkam bun bha ki nongtrei kynthup ïa kito kiba la tbit bad ki bym pat tbit na ka bynta ban tei biang ïa ka Kerala, kumta ngi kwah ban trei lang halor kane ka bynta,” ong u President ka AIMA Meghalaya Unit, u Pradeep Pillai haba kren bad ki lad pathai khubor ha ka sngi Balang.
Katkum ka jingïathuh jong u, haduh 13 na ki 14 tylli ki distrik jong ka Kerala ki la shah lynshop tyngeh ha katei ka jingshlei um kaba sdang naduh ka 17tarik mynta u bnai. Ha kajuh ka por pat u la ai khublei ïa ka sorkar Meghalaya kaba la pynbna ban noh synñiang haduh 1klur tyngka na ka bynta ban maramot biang ïa katei ka jylla.
U President u la ïathuh ruh ba watla ki don bun ki nong Meghalaya khamtam ki samla kiba leit pule sha Kerala hynrei haduh mynta kim pat ïoh jingtip ei ei ba kin don ki briew na kane ka jylla kiban shah ktah ha katei ka jingshlei um.