Press "Enter" to skip to content

Wanrah nam ka Sookini ha ka Miss India Tourism Asia International

Jop biang i Kong Anbolin ha ka ïakop thei bhabriew

Shillong, Nailar, 22: Ka Samla Sookini Sutnga sa shisien pat ka la wanrah nam ym tang ïa ka thaiñ rilum Jaiñtia hynrei ïa ka jylla Meghalaya hi baroh kawei lyngba ka jingjop jong ka ha kyrdan kaba ar ha ka rynsan ïakop thei bhabriew ba la tip kum ka “Miss India Tourism Asia International.”
Ha katei ka jingïakop ka Sookini ka la ïoh ïa katei ka jingjop napdeng ki 24 ngut ki nong ïashim bynta na ki Jylla bapher bapher jong ka ri India.
Ïa kane ka jingïakop la pynlong da ka ka Nupur Saigal kaba long ka National Director bad ka Brand Ambassador jong ka Miss and Mrs India Tourism International ïa kaba la pynlong hapoh Novotel Hotel, Guahati naduh ka 10 haduh ka 12 tarik mynta u bnai.
Ïa katei ka jingïakop la pynlong ha ki lai bynta (Round), kata ha ka riam Traditional Dress, Designer Wear bad Evening Gown. Ka Sookini ka la bat teng ruh ïa ka nam Miss Cherry Blossom 2017 (India International Festival), bad ruh ïa ka nam Miss Hynñiewtrep 2018. Nalorkata, ka la bat teng ruh ïa ka nam Miss Popular of Sunsilk Mega Miss North East 2017.
Mynta ka Sookini kan ïoh ban mihkhmat ïa ka ri India ha ka Miss Tourism Asia International 2018 ka ban sa long ha Philippines. Ka Sookini kaba dei na ka shnong Sutnga East Jaiñtia Hills District bad ka dei ka khun jong i Kong Wailadmi Sutnga.
Ha kawei pat ka liang, i Kong Anbolin Syiemlieh i la ïoh rah biang ïa ka jingjop ha ka rynsan ïakop thei bhabriew ba la tip kum ka “Mrs India International Global 2018, ha kaba i la ïoh ia ka khusnam Sub Winner.
Ïa katei ka jingïakop la pynlong ha ka nongbah Guahati ha ka 20 tarik mynta u bnai. Mynta i Kong Anbolin i la shah jied ban leit mihkhmat ïa ka ri India sha Philippines ka ban sa long shen mynta u snem 2018.
I Kong Anbolin i ba dei i khun jong i Kong (L) Lovelin Syiemlieh bad u Bah Bright Blah bashong basah ha Pynthorbah-Block-II, Shillong.
Kane ka longkmie ka la ju ïoh rah ïa ka nam jop ha ka rynsan ïakop thei bhabriew ba la tip kum ka ‘Mrs Glamorous India Elite 2018,” kaba la long ha ka 3 tarik u bnai Rymphang mynta u snem ha kaba ka la jop ha ka kyrdan kaba lai.
Halor ka ishu nongrep yn ïakhun