Press "Enter" to skip to content

Ai jingsneng ka Ranikor Constituency ïa u MLA barim

Babu Kular Khongjirem
Shuwa ban long Bye – Election ha Ranikor Constituency ha ka 23.08.2018, kiba bun ki leader heh jong ki political party bapher bapher jong ka State ki la ïa kop bad kyrhuh la kum ki laren khlem pat da dum slap ruh. Ka jingkob jong ki ka long haduh palat pud ba ki la jop lypa wat shuwa ba ki paidbah kin thep ïa ka vote jong ki. Dei ynda haba la mih ka Result Bye-Election ha ka 27.08.2018 ba ki la sdang ban kyndit bynriew bad nang ban pyndem toin ha ka bor bad ka iktiar u paidbah bad ki sa ïa kren pat sa da kumwei ka sur hakhmat u paidbah.
Toi, ha ka jingshisha, ki paidbah ka Ranikor Constituency ki la jied pynjop donburom ïa u MLA jong ki uba la ju mihkhmat na ka Seng Congress la kumba 20 snem tam mynta, u Mr. M.M. Dango. Hynrei tang hadien 4/5 bnai eiei, utei u MLA uba la kwah ban bujli uniform (party) na ka Congress sha ka NPP tang namar ba ka dei ka party ba la ïalam ïa ka Sorkar MDA bad kaba ai ïa ka Civil Sub Division u la resign noh na ka kam MLA ban ïaleh thymmai noh na kawei ka party. Ka jingkhmih lynti jong utei u MLA ka la pulom noh namar ki paidbah ka Ranikor Constituency ki la ai jingsneng pynban da kaba tyngeh ïa u da kaba pynrem kput bad jied thymmai noh ïa u Bah Pius Marwein na ka Seng UDP.
Kane ka jingshah rem u M.M. Dango ka long ym tang ka jingsneng ïa u hynrei khamtam eh ïa kito ki MLA kiba dang mut ban ïa kynthih sha kawei ka kper ne iehnoh party (resign) bad ban ïaleh election thymmai (Bye-election) biang na ka NPP kumba leh u Mr. M.M. Dango. Kane ka jingshah rem utei u MLA barim ka Ranikor Constituency ka pyni ba ki MLA kim lah satia ban shu kheiñ dew thala (take for granted) ïa ki paidbah ba bun balang. Dei u paidbah uba don ka bor bad ka iktiar ym dei ki nongmihkhmat paidbah (MLA/MDC) kumba ki ju kheiñ jem palat ïa ki paidbah na ka por sha ka por. Ban shu resign ïa ka kam MLA tang ban pynbiej ïa ka Civil Sub Division ne ka District thymmai kam don jingmut ha khmat ki paidbah. Wat la ka Ranikor ka dei ka thaiñ kaba dang sahdien ha ki liang baroh hynrei ka pynpaw pat ïa ka jingstad bad ka jingshem phang ha khmat ki constituency kiba lah shai. Kane ka dei ban long ka nuksa ïa kiwei pat. Ynda ki paidbah ki la sloit ïa ka iktiar wat u syiem ruh u kylla ‘riewmadan.
Shuwa ban thep vote, ki la mih ki kyntien kiba sngew danda suda na ki nongïalam party. U National Vice President ka NPP uba long ruh u Deputy Chief Minister u la pynmih ki kyntien ba lada ki paidbah kim thep ne vote ruh, u candidate ka NPP ka Ranikor un jop hi khlem artatien. Ka UDP pat ka la ïathuh lypa ba ka dei ka ‘Bye Bye Election’ ïa u Mr. M.M. Dango. Ka Congress te ka kwah ban pynrem ïa u M.M. Dango ba u shet kylla bad shet syrwa ïa ka party jong ki. Katba ka PDF pat ka kyrmen ban jop ha ka Issue common candidate jong ki party baroh.
Ban shu ïa kheiñ jingkheiñ kulmar ïa kano kano ka constituency jong kiwei pat kam long satia kaba suk. Ka jingsngew, ka jingmut – jingpyrkhat bad ka jingstad jingshemphang ki paidbah ka ïapher bak-ly-bak na kawei ka constituency sha kawei pat. Ka Pynursla ne Nongkrem Constituency ka ïapher na ki briew jong ka Mawkyrwat ne Ranikor Constituency. Ym ju lah ban ïathuh lypa ïa ka Election. Ka kam ïaleh election kam ju neh slem.
Ka jingkhlaiñ bad jingtlot jong ki party ka hiar ka kiew (fluctuate) katkum ka jingkylla ka por. Ka ktien ka ju ong ba ‘uba rkhie nyngkong un sa ïam khadduh’.
Ha kawei pat ka liang, ‘uba rkhie la la dei ban ïam, uba shngaiñ la la sah marwei’. Ka Election MDC kam slem shuh sa tang kumba 6 bnai eiei. Ki sitting MDC ki dei ban pynkhreh lypa lada ki kwah ban shah jied biang sa shisien ha ki paidbah lym kumta ki lah ban jah noh syndon thiaw ha ka political career jong ki.