Press "Enter" to skip to content

Bthah ka MSPB ïa ka tnad Mining&Forest ban ïarap pynkhreh mardor ïa ki Plan

Ba hukum ka Kashari ban khang ïa ki par maw bad sawmill

Shillong, Nailar 29: Ka Meghalaya State Planning Board (MSPB) hynne ka sngi kala bthah ïa ka Tnad Mining& Geology bad ïa ka Tnad Forest ba kin iarap lem ïa ki Trai jong ki par maw/ki karkhana tylliat maw (stone crusher) bad ki karkhana otdieng(Saw Mill), ha ka jingpynkhreh ïa ki Plan ba kin lait na ka jingshah khang khyrdep kat kum ka hukum jong ka Ïingkashari Meghalaya High Court.
Ka MSPB kala bthah ruh ïa kine ki Tnad Sorkar ba ki dei ban ai ka jingmynjur noh hapoh ka 45 sngi ïa ki Plan bala phah da ki Trai jong ki par maw/ki karkhana tylliat maw bad karkhana otdieng khnang ba kin lah beit ban treikam kumba ju long bad ban nym buh ruh ïa ka jingeh ym tang ïa ki Trai bad ki Nongtrei hynrei wat ïa ka Jylla baroh kawei.
Ka MSPB kala shim ïa kane ka rai ha ka jingïalang bishar kam(review meeting) halor ki rukom treikam jong ki Tnad bapher bapher ka Sorkar Jylla ba long hynne ka sngi ha Conference Hall, Secrtariat.
Ka Tnad Mining & Geology bad ka Tnad Forest jong ka Sorkar Jylla ha u bnai Naitung bala lah, kala pynmih ïa ka hukum ba phah khang khyrdep lut ïa baroh ki par maw/ki karkhana tylliat maw bad ki karkhana otdieng ba treikam be-aiñ hapoh ka Jylla.
Ka Tnad Mining & Geology kala pynmih ïa kane ka hukum halor ka jingbthah jong ka Ïingkashari Meghalaya High Court kaba hukum ba phah kahng khyrdep lut ïa ki par maw bad ki karkhana tylliat maw kiba treikam khlem ka Mining Lease/NoC kat kum ka Meghalaya Minor Minerals Concession Rules (MMMCR), 2016, kaba long ka jingpynkheiñ ïa ka hukum jong ka National Green Tribunal (NGT) ba mh ha ka 5/08.2013 bad ka hukum jong ka High Court ba mih ha ka 30/06/2015 na ka mukotduma u Tangkham Sangma ba pyrshah ïa ka Sorkar Jylla.
Haba ïakren bad ki lad pathai khubor hadien ka jingïalang, u Chairman ka MSPB Bah Lambor Malngiang ula ong “Ngi burom ïa ka hukum jong ka Ïingkashari hynrei ka MSPB ka sngewkhia jur ïa ka jingshah ktah u paidbah ka Jylla namar ka jingpynjari ïa ka hukum khang tih marpoh khyndew kawei hadien kawei pat”.
Haba ïadei bad ki par maw bad ki karkhana tylliat maw, u Bah Lambor u ïathuh ba ka Tnad Mining kala pyntip ba ki trai jong ki par maw bad karkhana tylliat maw ki dei ban applai ïa ki Mining Plan khnang ba ka jingtih maw kan long kat kum ka juk stad saian.
Kat kum ka jingong jongu, ki par maw bad karkhana tylliat maw kiba dang treikam mynta ki don 7 tylli ha Ri-lum Garo bad kine ki dei kiba la don ka Mining Plan hynrei kiwei kiwei kiba don ha Jylla kin hap ban pynkhreh ïa ki Plan jong ki. U ïathuh ba ïa mynta, haduh 16 tylli ki karkhana tylliat maw kila applai ïa ka Mining Plan hynrei ym pat mynjur satia.
Haba pynpaw ba ka Tnad Mining ka dei ban pynsuk ïa ki trai par maw bad karkhana tylliat maw ba kin ïoh ïa ki Mining Plan, u Bah Lambor ula ong “Kumba ju long baroh shikatta, ka Meghalaya State Pollution Control Board ka dei kaba ai NOC bad ka Tnad Mining kan sa pynmih ïa ka hukum. Ngi kwah ba kane ka rukom treikam kan long beit kumjuh hynrei ban kham pynsted noh ïa ka kam ban nym pyndik eh ïa u paidbah”
:Namar kata, ngi la ai jingmut ba ka Tnad Mining ka dei ban ai ka jingmynjur hapdeng 30 sngi haduh 45 sngi ïa ki Mining Plan bala pynkhreh da ki trai par maw bad ki karkhana tylliat maw” ula ong.
Haba pynpaw ba ka Jylla kala shah ktah jur bad kala duh nong bha ruh ha ka jinglum khajna naduh ba khang tih dewiong, u Bah Lambor ula ong “ Ka hukum ban khang sa ïa ki par maw/karkhana tylliat maw bad ki karkhana otdieng kan sa ktah jur ïa ka Jylla ha kiba bun ki liang”.
“Ka Board ka sngew ba ka jingkhang shisien khang ïa ki par maw/karkhana tylliaw maw bad ki karhana otdieng kan sa ktah jur bha ïa ka kamai ka kajih bad ka rukom im ki paidbah ka Jylla” ula ong haba ai nuksa “Lada khang ïa ki sawmill, ka por kan sa poi ba wat ïa ka synduk metïap ki briew ba ïap ruh yn nym ïoh shuh ha Jylla”.
Kumjuh ruh u ong ba ka jingkhang ïa ki par maw bad ki karkhana tylliat maw kan sa ktah jur ïa ka jingïaid ki kam pynroi jong ka Jylla da kaba ong “Mynta ka Jylla ka shna surok hynrei kumno shuh kan shna ïa ki surok lada ym ïoh maw shuh”.
Haba pynpaw ba ka tnad Forest bad ka Mining &Geology ki dei ban kham pynjynsur ïa ki Rules bad Regulation, une u Chairman ka MSPB u ïathuh ba ka Board kala bthah ïa kine ki Tnad ba kin ïaid suki ha ka jingpyntreikam ïa ka hukum jong ka Kashari khlem da pynkheiñ ïa ka hukum.
“Kawei ruh ngi dei ban pyrkhat ba kine ki par/maw/ stone crusher bad ki saw mill ki dei kiba treikam na ka bynta ban pynbit pynbiang ïa ka mar tang ban pyndonkam hapoh ka Jylla ym ban shalan sha barka Jylla” ula ong.