Press "Enter" to skip to content

Die u Khasi ïa ka dukan ha Iewduh sha ka bar jylla, dawa pyndam Patta ka FKJGP

Shillong, Nailar, 29: Ka Federation of Khasi-Jaiñtia and Garo People (FKJGP) mynta ka sngi balang ka la dawa na ka Ophis jong u Syiem ka Hima Mylliem ba ka dei ban tuklar da kaba pynduh noh mardor ïa ka kot Pata kaba la ïoh da ka Bar jylla kaba la thied ïa ka dukan na u Khasi ha Iewduh namarba ka long pyrshah ïa ka Meghalaya Transfer of Land Regulation Act, 1971.
U Bah Elton Warjri, Asst. General Secretary ka FKJGP ula ong ba ka jingïakynduh ïa u Pa’iem Ainam Manik Syiem, u Acting Syiem ka Hima Mylliem u la ong, “ngi la dawa na u Syiem ba u dei ban pynduh pyndam noh ïa katei ka kot Patta kaba la ïoh da ka bar jylla kaba la tip kyrteng kum ka Meera Rani Kuri kaba la thied ïa ka dukan na u Bah Sukina Nongbri kaba long pyrshah ïa ka Land Transfer Act.”
U la ong ka jinglap jong ka Seng ka dei tang ka jingsdang bad nangne shakhmat u Acting Syiem ka Hima Mylliem un ïatreilang bad un pynlong ïa ka jingjurip hadien ka Dorbar Bah jong ka Hima Mylliem.
“Ki riewshimet ki lah ban shna ïa ki dukan jong ki hynrei kim lah ban die sha ki bar jylla namarba katei ka jaka ka dei jong ka Hima bad ka jingkylli kaba mih ka long kumno ki briew ki lah ban die ïa ka dukan ryngkat bad ïa ka khyndew ka bym dei hok ka jong ki” ong u Bah Bah Reginald Thabah, Information Secretary ka FKJGP.
“Lada lada u bar jylla u lah ban thied ïa ka dukan yn nym don jingeh eiei ban kurup ruh ïa ka jaka,” ula bynrap.
Une u nongïalam ka FKJGP, u la ong ba ka seng ka la pynpaw ïa ka jingsngewkhia ha kaba ïadei bad ka jingshah tuh bad jingshah kloh pla ki paidbah kiba leit iew leit hat bad na ka liang u Syiem Mylliem u la kular ban shimkhia mardor ha kane bad ban bthah ïa ki pulit Syiem ba kin ïaid pahara manla ka ar kynta ha kylleng ki Basa kiba don ha Iewduh.
U Bah Reginald u la ong ba ka seng ka la dawa na u Acting Syiem ba u dei ruh ban pynduh pyndam noh ïa ka jingai Tender u Acting Syiem barim, u Pa’iem Ricky Nelson Syiem haduh 2-3 snem ban pynïaid ïa ka Iew bad kiwei kiwei ki kam.
“Ngi dawa na ka Hima ba ka dei ban pyndam noh shi syndon ïa katei ka jingai Tender 2-3 snem ban pynïaid ïa ka Iew bad kiwei kiwei ki kam bad dei ban ai Tender manla u snem bad kamno ka dor jong ka tender kan neh katjuh na ka bynta 2 snem: ong u Bah Thabah bad bynrap, ka jingai Tender ka dei ban long tang shi snem khnang baroh kin ïoh bynta lang ïa ka jingpynïaid ïa ka iew ym ban bat sah da uwei u briew da ki snem bad ha kajuh ka por u la ong ba ka seng ka dawa ba dei ban pynduh noh ïa kitei ki Tender ki ban kut ha u snem ban wan bad dei ban phah tohkit halor katei ka kam.