Press "Enter" to skip to content

Kynnoh ba wan pynpra biang ka Assam ïa 2 ki ïing IAY bad ka ïing Dorbar ha Umru

Nongpoh, Nailar 29: Kawei na ka Shnong ha khappud ka Meghalaya bad ka Assam ki la hap biang ban mad ïa ka jingjia ba sgnewsih, ha kaba ki paidbah ki la kynnoh ba ki Pulit bad ki ophisar na ka tnad Forest jong ka Assam ki la wan biang ban thombor da kaba leit pynpra jubor ïa ki ar tylli ki ïing IAY bad ruh ïa ka ïing Dorbar jong kawei ka Shnong ha khappud Meghalaya bad Assam ha Ri Bhoi District.
Kane ka jingjia ka la jia sa ha ka shnong Umru ba hap ha ka Raid Nongtung bad ruh kaba dei ka jaka ba dang ïa kajia pud hadpeng ka Meghalaya bad ka Assam bad kumba la pyntip da ki nongshong shnong la ong ba ha ka sngi Nynkong ba la dep ha ka por 1 baje ei ei mynsngi ki kynhun Pulit ka Assam bad ki ophisar na ka tnad Forest ki la wan sha katei ka Shnong ban shu pynpra beit naphang ïa kitei ki ar tylli ki ing IAY bad ruh ka ïing Dorbar bala shna da ka Shnong Umru.
Kum ban pynkynmaw, dang katto katne bnai, ka Assam ka la wan ban tei ïa ka Police Outpost ha ka Shnong Umru bad dei lyngba ka jingpyrshah da ka bor District bad ruh da ki kynhun seng bhalang na Ri Bhoi ba la pynsangeh noh ban teiïa katei ka police outpost, bad mynta pat ka Assam khlem jingmap ka wan ban pynpra pat wat ïa ka ing baduk ba la shna da ka skhim IAY bad ruh ka ïing Dorbar jong ka Shnong Umru.
Halor kane ka jingjia, haba wad jingtip na ka Deputy Commissioner ka Ri Bhoi lyngba ka phone, ka Kong R.M Kurbah ka la pyntip ba ka la ioh jingtip halor kane ka jingjia ba la shah pynpra ki ïing IAY bad ruh ka ïing Dorbar jong ka Shnong Umru,hynrei kam pat ioh jingtip mano ba la don kti hakatei ka kam pynpra ïa ki ing bad ruh ka ïing Dorbar Hall ha kaba kum ka Khliehduh ka District ka dang phah ban leit jurip da ki Pulit ka Ri Bhoi.
Halor kane ka jingshah pynpra kitei ki ing bad ruh ka ïing Dorbar, ka Kong R.M Kurbah ka la ong ruh ba ka dang ap ïa ka kaiphod ki Pulit kiba la leit ban jurip bad ruh halor kane ka jingjia ka la dep ban pyntip shaka sorkar jylla.
Shuh shuh, ka long ruh ha ka jingshisha la dep ruh ban pynlong ïa ka jingiakren dang shen hadpeng ka Assam bad ka Meghalaya ha ka kyrdan DC ba ngim dei ban pynpra ïa kino kino ki skhim sorkar la ka dei na Assam ne Meghalaya ha kitei ki shnong ba dang ïa kajia pud bad lada ka Assam ka leh pyrshah ka dei pat ka kamram jong ka sorkar jylla ban pyrshah katkum ki lynti jong ka aiñ, ka la bynrap.
Pynbna ka UCIL ban khang