Press "Enter" to skip to content

Nang tur ka Assam sha jylla Meghalaya, 65 klur mang ïa ka surok 19 km ha thaiñ Langpih

Nongstoiñ, Nailar 29: Ka Assam ka la nang tur sha ki jaka ka Meghalaya kiba don ha thaiñ Langpih, haba ka la dep ban mang pisa haduh 65 klur tyngka na ka bynta ban pynbha noh ïa ka surok kaba 19 kilometer na Kamphol duli ban pynpoi shaduh Mawsikar jong ka thaiñ Langpih. Katkum ki tyllong khubor ba la ïoh lum da u nongthoh khubor, la ïathuh ba ka sorkar Assam ka la dep mang ïa kane ka pisa ba 65 klur tyngka, naduh u bnai Ïaiong mynta u snem bad ka jingthmu ka long ban siang da ka surok dew bilat shilynter ïa kane ka surok.
Kumban shu kdew hangne ba kane ka surok 19 kilometer ka dei kaba la shna naduh Kampholduli jong ka Aradonga Out post marjan bad ka Battalion camp jong ka Meghalaya. La dep ban shna ban tih naduh u snem 2004 lyngba ka tnad DRDA jong ka Kamrup District Assam. Dang ha u snem ba la lah, ka sorkar Assam ka la sdang ban siang dew bilat ïa kane ka surok tang kumba 1 kilometer ei ei. Hynrei ka jingmang pisa kaba haduh 65 klur, ka dei ka jingthmu ban pyndep noh syndon bad la antad ruh ba ka kam kan sdang noh shen ha kine ki bnai tlang.
Hynrei, haba ïakynduh bad ki riew paidbah Khasi kiba don ha katei ka thaiñ ter ter shaduh Mawsikar Langpih, ki la ong ba kane ka jingthmu ka long ban pynskhem ïa ka jingkam kynti jubor jong ka Assam ïa ki jaka kiba hap hapoh ka Hima Raidmynsaw Sirdarship, West Khasi Hills. Ki la kren dumok ruh ba ka sorkar Meglalaya kam nud satia ban pynkheiñ ïa ka jingïateh kular lyngba ka Status Quo kumba la pynbeit. Ha ka jingshisha kino kino ki kam pynroi ha katei ka thaiñ la ka long na ka sorkar Meghalaya ne Assam, u Deputy Commissioner jong ka West Khasi Hills bad jong ka Kmarup ki dei ban ïa pyntip mar kylliang. Hynrei u DC ka Kamrup um ju patiaw bad um kheiñ snep, namar u tip ba ki heh ka sorkar Meghalaya kim nud satia ban saham.
Shuh shuh, ki la ong ruh ba hadien ba ka Assam ka la dep pyntrei ïa katei ka surok ha u snem 2004, ka la sdang sa ban pynpoi bording haduh Mawsikar bad haduh ban da dep ïa katei ka jing pynpoi bording, na ka liang ka sorkar Meghalaya ka shu sngap jar jar. Nangta mynta ka la sdang ban pyntrei sa ïa kawei ka surok thymmai na Langpih sha Mawkoibari, hynrei haduh ban da pyndep ym don ba pynwit satia. Dei halor kane ka nongrim ba ka sorkar Assam ka la sngewthuh ba ki heh sorkar jong ka jylla Meghalaya ha khmat ka sorkar Assam ki long kum i khnai ha khmat ka miaw.
Haba pyrshang lum ïa ki jingtip pat na ki katto katne ki nongshong shnong jong ka Assam, uwei u briew (ba la buhrieh kyrteng) u ba don ha syndah eh bad ka Nandita Das MLA Kamrup, u la ong ka jingtheh jong ka sorkar Assam ïa ki kam pynroi ha ki thaiñ Langpih ka long na ka bynta ban pynskhem shuh shuh ba kitei ki jaka ki dei hok kiba hap hapoh ka kamrup District. U la ïathuh ruh ba ki don shibun ki nongshong shnong kiba dei ki Khasi kum na ka shnong Mawlan, Iewnongma, Mawdiangsnam, Umwali bad wat na Langpih kiba la ïoh jingïarap na ka sorkar Assam ha kaba shna ïing bad kiwei kiwei. Kumba long mynta ki don kumba 25 iing ei ei ki Khasi kiba la ïoh jingmyntoi. U la ïathuh ruh ba ïa ka surok na Kyrdum haduh Kampholduli, na ka liang ka sorkar Assam ka la phah pyntrei ha u Bah Lowi Kharlyngdoh.
U la ong ruh ba wat la ha katei ka thaiñ ym don satia ki Assamese, Rabha ne ki Boro kiba leit ban buhai shnong, hynrei ki Nepali kiba shong ha katei ka thaiñ ki la kham bun paid ban ïa ki Khasi. Na ka liang ka sorkar Assam ka theh beit ïa ki kam pynroi namar baroh ki donkam ïa ki lad pynroi. Kampher la ki dei ki Khasi ne ki Nepali baroh ki donkam jingpynroi bad kumba long mynta lei lei ki Khasi ruh ki la mih shakhmat ban ïatreilang namar ki kwah ïa ki kam pynroi kumba ïoh lem kiwei.