Press "Enter" to skip to content

Pulom ka jingshimti kam u Acting Syiem Hima Sohra bym ai shabi u Syiem shah sospon  

Sohra, Nailar 29 : U Acting Syiem ka Hima Sohra, Bah Dangkiewdor Khongwir ryngkat ki Bakhraw, ki nongsynshar shnong jong ka Hima khamtam eh ki nongialam ka Joint Action Committee ha ka sngi Balang ki la hap ban shu ap kai da ki kynta ha phyllaw jong ka ophis Hima tang na ka daw ba u Syiem ba la shah sospon um shym la aiti satia ia u shabi jong ka ophis Hima ha u Acting Syiem.
Lah ban kdew hangne, ba ka KHADC ha ka sngi Ba-ar ka la pynbna ba ka la sospon haduh shibnai ia u Syiem ka Sohra khnang ba kynhun tohkti kan ioh ban tih pura halor ki jingkynnoh ba utei u khliehduh ka Hima u die ia ki jaka jong ki Khasi  kiba don ha majai sha ki bar jylla.
Ha katei ka sngi ki la don bun bha ki nongialam shnong na ka Hima Sohra ki la ia wan ban synran bad ai khublei ia u Acting Syiem jong ka Hima, phewse katei ka kam kam shym la urlong namar ba u Syiem ba la shah sospon tad haduh shwa ban kem dum um shym la ai ia u shabi.
Namar ka jingtieng ioh kumno kumno ka mih ka jingkulmar, mardor ki pulit ka Sohra Police Station, hapoh ka jingialam jong u Bah Manbhalang Rymbai kumjuh ka Majistor, Kong JM Umdor ki la wan mardor sha katei ka jaka ban tuklar lang.
Kumta, hadien ka jingpynbeit lang hapdeng ka Majistor, u OC ka Sohra bad ki  nongialam ka JAC kumjuh ki Bakhraw,  la ia mynjur ba ki pulit kin pahara ia katei ka ophis Hima khnang ban khanglad ioh ka don kano kano ka huri hura ne ioh don ki briew kiba thmu ban rung shapoh katei ka ophis jong ka Hima katba ym pat lah ban pynbeit ia katei ka kam.
Hadien kane, na ka liang ka JAC lyngbah u Chairman, Bah JJ Sawian u la iathuh ba namar kim lah ba pyndep ia ka kam ha katei ka sngi, kumta ia ka jingshimti kam jong u Acting Syiem la pynbeit noh ba kan long ha ka sngi Palei ha ka por 10:00 baje mynstep.
U la ong ruh ba lada jia ba u Syiem ba shah sospon um aiti ia u shabi, kum ka JAC bad ki Bakhraw kim banse ban pyntip sha ka KHADC ban leh syndon da kaba tyngeh. U la ong ruh ba kum u Syiem u dei ban sngewthuh ba katei ka ophis ka dei jong ka Hima ym dei jong u Syiem shimet, kumta kam don nongrim ba un iai pynslem ban aiti noh ia u shabi.
“Ka jingap jongngi ia u Syiem ba un aiti ia u shabi kadei ba ngi burom ia u, kum u Syiem bad kawei ruh ba ngim kwah satia ba ngin leh da ka bor,” bynrap biang u Chairman.
Shuwa kane, na ka liang  u Acting Syiem pat u la ong ba um lah shuh ban sngewthuh halor ka jingpyn slem jong u Syiem ba shah sospon ban aiti ia u shabi jong ka ophis Hima watla na ka liang ka Council ka la dep ban pynmih ia ka hukum.
La katta pat u ong ba kumba u Syiem u kwah ban aiti hi markhmat ia u shabi bad ia ka kam, na ka liang jong ki ruh kin ap ha ka sngi kaba bud.