Press "Enter" to skip to content

Pynbna ka UCIL ban khang shuwa shipor ïa ki Ophis treikam ha Meghalaya

Shillong, Nailar 29: Ka Uranium Corporation of India Limited (UCIL) kala pynbna ba kan khang noh shuwa shipor ïa baroh ki Ophis treikam jong ka ha Meghalaya, namar ka jingbym iohlad ban tih Uranium napoh ka Jylla.
Ha ka shithi bala pynmih hynne ka sngi balang, u DGP ka UCIL (I/P & IRs) u SK Sharma ula ong “La pynbor ba ka UCIL kan hap ban khang shuwa shipor ïa baroh ki Ophis treikam ha Meghalaya”.
Haba pynpaw ba ka UCIL kala sdang ban leh ïa ki kam tih Uranium ha Meghalaya la 15 snem mynta, u Sharma ula ong, hynrei ka UCIL haduh mynta kam pat ioh satia ïa ka Mining Lease bad ki jingai jingbit ba donkam na ka Sorkar Jylla.
“Hynrei ngin dang pyrshang beit ban ioh ïa ka Mining Lease bad ka jingai jingbit na ka Sorkar Jylla” ula ong.
Ïa kane ka shithi la pynmih hadien ka jingmih ka jingiakhih jong ki Nongtrei ba trei ha ka Ophis ha Shillong bad Wahkaji, kiba la mih pyrthei ban pyrshah ïa ka ai ban pynkynriah ïa ki tiar ki tar jong ka UCIL na Shillong sha Jharkhand. Haba kyrpad ïa ki Nongtrei ba kin iatreilang ha kaban pynlait noh ïa ka Ophis jong ka UCIL ha Meghalaya bad ban pynkynriah ïa ki tiar ki tar, u Sharma ula ai ka jingkular da kaba ong “Hadien ka jingioh pdiang ïa ki jingai jingbit ki ban ailad ïa ka UCIL ba kan tih Uranium ha Meghalaya, yn sa khot biang ïa phi ban ai ka jingshakri. Baroh ki jingsiew ba dei ban siew kat kum ki kyndon jong ka Sorkar yn sa siew da ka UCIL ha ki khyndiat por ban wan”.
Une u Heh ka UCIL ula maham ruh ba kino kino ki jingpynthut yn sa shimkhia bha da ka kompani bad kan sa pynngat ruh da ka kuna pyrshah ïa ki.
Lah ban kdew ba ka UCIL ka don haduh 10 ngut ki Nongtrei kiba trei ha Meghalaya ha kine ki 10-15 snem bala leit noh. Napdeng kine, 6 ngut ki trei ha ka Ophis ba don ha Shillong bad 4 ngut ha Wahkaji.
Na ka liang ki Nongtrei kila pynpaw ïa ka jinglong ba kloi ban leit trei sha Jharkhand hynrei kim pdiang satia ban shah pynduh noh na ka kam ba ki trei baroh shikatta.