Press "Enter" to skip to content

Pynshlur ïa ki Kynthei ha ka kam saiñpyrthei, ong ka PDF

Shillong, Nailar 29: Ka Peoples’ Democratic Front (PDF) ka la buh ïa ki jingai jingmut hakhmat ka Election Commission ka Ri India (ECI) ba kan pynshlur ïa ki Kynthei ba kin ïashim bynta ha ka sain-pyrthei ym shuh ban long tang kum ki nongkitkam hynrei kum ki kyrtong ban aireng ha ki elekshon.
Ka PDF kala buh ïa kine ki jingai jingmut ha ka jingïalang bala khot pynlong da ka ECI myn ha ka 27 tarik Nailar ha Pravasi Bharatiya Kendra, Chankyapuri, New Delhi ha ka 27 tarik u Nailar, kaba la wan ïashimbynta da ki seng saiñ pyrthei bala ïoh ïa ka jingithuh na ka Commission.
Ka ECI ka la khot pynlong ïa kane ka jingïalang ban pan ïa ki jingai jingmut na ki seng sain-pyrthei ban pynjanai ïa ka jingtrei kam khamtam haba pynïaid ïa ki elekshon jied nongmihkhmat hapoh ka Ri. Ïa ka PDF la mihkhmat da u President u Bah Ivanlumlang Marbaniang bad u Finance Secretary u Bah Aibor L Nonglait.
U Bah Ivanlumlang Marbaniang President ka PDF haba ïakren bad ki nongthoh khubor u la ong, “Kum ka party ka sngew don kam bha ban pynshlur ïa ki Kynthei bad ki Longkmie ba kin ïashimbynta shithem ha ka saiñ hima sima bad ban mihkhmat ruh kum ki kyrtong haki rynsan ïakhun elekshon”.
U Bah Ivanlumlang u la ong ba ha ka jingai jingmut sha ka ECI, ka PDF ka rah ruh ïa ka mat ba ki Block Level Officers ki donkam ban ïa trei lang bad ki bor pynïaid shnong ha ki jaka nongkyndong bad ki ophisar Municipal ha ki jaka sor ban wan rah ka ilekshon jied nongmihkhmat kaba khuid bad shai.
Da kaba pynpaw ïa ka jingiahap jingmut, ka PDF ka mynjur ïaka jingbuh da u pud ha kaba ïa dei bad ka jing-pynlut pisa da ki seng sain-pyrthei la ka long ha ka ilekshon Ing Dorbar Parliament lane Ing Dorbar Thaw-ain ka jylla.
“Hynrei ka jing-pynlut ka dei ban da peit ruh kat kum ka jinglong jingman jong ki jaka bad ki shnong kiba lah ban buh jingeh ïa ki seng sain-pyrthei. Ki don ki jaka ha ka jylla Meghalaya kiba jngai na ki surok ïaid kali bad donkam ruh ban hap pynlut ïa ka bor bad ka por wat haduh ban da hap sah miet bad kane ka donkam ïa ka jing-pynlut kaba kham bun”, u la ong.
Ka PDF ka la kdew ruh ba donkam ban khang ïa ka jingtreikam jong ka kor Internet kumba 48 kynta shwa ka tarik thep vote kano kano ka ilekshon khnang ban tehlakam ïa ka jingpynkheiñ ïa ka Model Code of Conduct bad ka jingïalap elekshon be-aiñ lyngba ki Social Media.
Kane ka seng sain-pyrthei ka la kdew ruh ba dei ban ai ka lad kaba kyrpang ïa ki briew ba don jinganna ha ki dkhot met ban ïa shim bynta ha ka ilekshon bad khamtam ki bym lah ban ïaid ban ieng. “Ngi kyntu ïa ka ECI ban pyn-treikam da ka e-postal ballot ïa kum kine ki briew”, la ong u President.