Press "Enter" to skip to content

Khang khyrdep ka FKJGP ïa ka project shna Sub-Station ka Power Grid ha Saisiej

Treikam ka Kompani khlem TL, ki Nongbylla khlem WP
Shillong, Nailur 02: Ka seng Federation of Khasi Jaiñtia & Garo People (FKJGP)-Mawryngkneng bad Mawlai Circle lem bad ka Dorbar Shnong Saisiej, East Khasi Hills, kila hiar khang tala ïa ka project shna Sub-Station jong ka Power Grid ha Saisiej namar ka jingpynkheiñ ïa ki kyndon Aiñ ka Jylla.
Kane ka jingkhang tala ka long halor ka nongrim ba ka Kompani ba shim contract ban pyntrei ïa kane ka project ka Techno Electric & Engineering Co.Ltd ba na Kolkata, kala treikam be-aiñ khlem ka Trading Licence na ka Khasi Hills Autonomous District Council (KHADC) bad kiNongbylla ba ka aikam, kim shym don satia ïa ki Work Permit bad register kyrteng ïalade kat kum ka Inter State Migrant Workmen (Regulation of Employment & Condition of Service) Act bad Rules 1985.
Ka seng FKJGP-Mawryngkneng bad Mawlai Circle lem bad ka Dorbar Shnong Saisiej kaba don marjan ka Umsawli, New Shillong Township, kila dep khynra Trading Licence bad Work Permit teng ha kane ka project jong ka Power Grid ha Saisiej ha u bnai bala lah bad kila aipor 15 sngi ïa ka Kompani (Techno Electric & Engineering Co.Ltd ) ba ka dei ban ïoh ïa ka Trading Licence na KHADC bad ban pynbiang ruh ïa ka Work Permit jong ki Nongbylla ba ka aikam.
Haba buddien ïa kane ka jingaipor, kine ki artylli ki Circle ka seng FKJGP bad ka shnong Saisiej kila hiar khynra biang hynnin ka sngi saitjain ban talasi ïa ki kot ki sla ba donkam hynrei namar ka jingshem ba ka kompani bad ki Nongbylla kim patiaw satia ïa ka jingaipor, kala pynbor ban khang tala shisyndon ïa ka project.
“Ka jingbym suidniew jong ka Kompani bad ki Nongbylla ïa ki Aiñ ka Jylla bad ka jingbym patiaw ïa ka jingaipor ka seng, la pynbor ïa ngi ban hap khang tala shisyndon ïa ka project” ong u Bah Varzeleno P Lyngdoh, Secretary ka FKJGP-Mawlai Circle haba ïakren bad u Mawphor.
Kat kum ka jingong jong u, ka seng FKJGP ne ka shnong Saisiej, kam don jingpyrshah eiei ruh em ïa ka project jong ka Power Grid hynrei namar ka jingpynïaid be-aiñ ïa ka kam, la pynbor ban leh eiei pyrshah ïa ka.
Ha kane ka jingkhynra, na ka liang ka FKJGP Mawryngkneng Circle la ïalam da u Working President Bah Bristar Mawthoh bad na ka Mawlai Circle la ïalam da u Bah Varzeleno P Lyngdoh. Na ka liang ka shnong Saisiej pat la mihkhmat da u Assistant Rangbah Shnong Bah R Pyngrope, u Secretary Shnong Bah RishanKharkongor bad kiwei kiwei ki nongkitkam shnong.
Lah ban kdew hangne ba ka Techno Electric & Engineering Co.Ltd kala sdang ban pyntrei ïa ka Sub Station jong ka Power Grid naduh u Nohprah 2017 bad la ong ba kane ka kompani kala iateh kular ruh bad ka shnong Saisiej ba kan phaikhmat nyngkong eh sha ki nongshong shong ka thaiñ haba aikam bylla ha kane ka project.
Hynrei la kynnoh ba kane ka kompani ka khlem bat satia ïa ka jingiateh kular bad kala pynkheiñ syndon ïa ki Aiñ ka Jylla da kaba wanrah ïa ki Nongbylla ba nabar ka Jylla khlem da ïaid kat kum ka Inter State Migrant Workmen (Regulation of Employment & Condition of Service) Act bad Rules 1985.
Hadien ka jingkhang tala ïa kane ka project, ka seng FKJGP kala beh krad ruh ïa kumba 47 ngut ki Nongtrei Bylla Bar Jylla kiba kam ïalade ba ki wan na Jylla Assam. Ïa kine ki Nongbylla Bar Jylla la beh halor ka nongrim ba kim don satia ïa ki kot ki sla kiba biang.
“Ngi suba jur ba kine ki Nongbylla Bar Jylla kim dei satia ki Nong Assam. Kim don kot don sla satia ban pynshisha ba ki dei na Assam bad haba kylli ïa ka NRC ruh ki pyntip ba kim shym don kyrteng satia” ong u Bah Varzeleno.
Une u Nongïalam ula buh jingkylli “Ki Ophisar ka Tnad Labour ka Sorkar Jylla bad ki Enforcement jong ka KHADC ki leh aiu…Hato ki nang tang ban bam tulop khlem da trei ïa ka kamram ba ki dei ban trei”.