Press "Enter" to skip to content

Ba shah ot kilo ha Ïew, yn kynduh lang ki nongrep

Shillong, Nailur 02 : Ka jingshah ñion beiñ palat ki nongrep ha ki mahajon ha Ïewduh bad ha kiwei kiwei ki ïew ka la pynlong ïa ka seng ki nongrep, ka Hill Farmers Union (HFU), Central Body ban pynlong
syndon da ka jingïalang paidbah jong ki nongrep ka Ri Khasi Jaintia ha ka 10 tarik mynta u bnai ha Mawkhar National Dorbar Hall, ha ka por 11 baje mynstep.
Katkum ka kyrwoh la ong ba ha katei ka sngi yn ïakren halor ki ar tylli ki jingeh kaba ki nongrep ki ïa kynduh, kata naduh ka jingshah ot kilo beaiñ ha ki nongkhaïi ïa ki mar jong ki nongrep ha kylleng ka jylla bad ruh halor ka jinghiardor jong baroh ki mar rep.
Ka kyrwoh na u Bah Allfondbirth Kharsyntiew General Secretary ka HFU, ka ong ruh ba ha katei ka sngi yn ailad ïa ki nongrep ba kin ïathuh bad pynpaw pyrthei lut ïa ki jingeh ba ki kynduh khnang ba ka seng kan ïoh pat ban pynsngew sha ki bor sorkar.
U la ïathuh ruh ba ha kane ka sngi yn ïoh ïa ka jingkren na u President jong ka sengkmie u bah Commander Shangpliang halor ki mat jingdawa kaba ka seng ka la leit rah sha u Myntri Rangbah ka jylla u Conrad Sangma bad kumjuh ruh sha u myntri ka rep ka riang bah B Lyngdoh dangshen.
Kumta na ka liang ka seng nongrep, ka kyntu ïa baroh ki nongrep ka Ri Khasi Jaintia bad baroh kiba don mynsiem ban kyrshan ïa ki nongrep ba kin wan ban ïashim bynta ha katei ka jingïalang khnang ba da kawei ka sur yn lah ban dawa ban pynduh noh syndon ïa ka jingot kilo be-ain ïa ki mar rep.