Press "Enter" to skip to content

Ïaishah, ka Sorkar ka la leh la kamram, pyntip ka MSSASA ïa ki nonghikai SSA

Shillong, Nailur, 02: Ka Meghalaya SSA School Association (MSSASA) Central Body ka la kyntu ïa ki nonghikai SSA kiba shah kdup ha kane ka kynhun ba kin long kiba ïaishah, namar ka Sorkar ka la leh la ka kamram ha kaba ïadei bad ka jingpyllait ïa ka tulop ba la sahkut la san bnai kynthih, kata, naduh u bnai Ïaiong haduh u bnai Nailar 2018.
Ka MSSASA lyngba u kyrwoh na u President, Bah Aristotle Rymbai ka la kyntu ïa ki 12541 hajar ngut ki nonghikai SSA ba kin ym leit ïashim bynta satia ha ka jingïakhih kaba shi sngi ba la khot pynlong da ka All Meghalaya SSA School Teachers’ Association (AMSSASTA) ha ka 5 tarik mynta u bnai.
Ka All Meghalaya SSA School Teachers’ Association (AMSSASTA) ryngkat ka jingïatreilang bad ka All Garo SSA LP & UP School Teachers’ Association (AGHSSASTA) ki la shim ïa ka rai ban ‘boycott’ ne ‘ym ïashim bynta’ ha ka jingrakhe ïa ka Teacher’s Day ka ban sa long ha ka 5 tarik, Nailur, hynrei kin pynlong da ka jingïashong kyllaiñ myngor (Sit-in-Demonstration) ha Parking Lot kaba don markhap bad ka Additional Secretariat, Shillong naduh ka por 10:00 baje mynstep haduh 4:00 baje janmiet.
“Ïa mynta, kum ki nonghikai ngi dei ban sngewthuh ba ki jingïakhih kim pynmih soh eiei khamtam ha kum kane ka por ba ka tnat Pule Puthi bad ka Sorkar Jylla ki la trei shitom ban weng ïa u sohkyrdot ba ngi la mad ha kaba ïadei bad ka jingpynkylla ïa ki kyndon ba thymmai jong ka Integrated Scheme Samagra Shiksha Abhiyan,” ong u Bah Aristotle.
Haba pynpaw ïa ka rai ba dang shen jong ka Ministry of Human Resources Development (MHRD) ka Sorkar India ban kynthup lang noh tang kawei ïa ki skhim, kata, ka SSA, RMSA bad Teachers Education lyngba ka Integrated Scheme for School Education bathymmai ba la tip kum ka Samagra Shiksha Abhiyan naduh u snem 2018-19 ter ter, une u nongïalam ka MSSASA u la ong, naduh u bnai Nailar, 2018, ka Seng ka la ïohlad ban ïaphylliew jingmut bad ka tnat Pule Puthi bad ka Sorkar Jylla da kaba ai ruh ïa ki jingai jingmut bad ki jingpynsngew.
Watla katta hadien ka jingïathir sani, ka Sorkar Jylla lyngba ka State Implementation Society SEMAM Executive Committee ka la pdiang ïa ki jingdawa jong ka MSSASA ban tyrwa ba ka tulop ba mynta kaba long T. 19044 shi bnai na ka bynta ki 5814 hajar ngut ki nonghikai skul Lower Primary bad T.20493 shi bnai na ka bynta ki 6727 hajar ngut ki nonghikai Upper Primary sha ka Project Approval Board (PAB), MHRD ban pynrung ha ka Annual Work Plan bad Budget 2018-19 jong ka Samagra Shiksha Abhiyan jong ka Jylla Meghalaya.
Shuh shuh, ka PAB jong ka MHRD ha ka kot buh jingthoh (Minutes) haba pdiang ïa ka Annual Work Plan & Budget na ka bynta u snem mang tyngka 2018-19 ïa ka jylla Meghalaya la pyllait ha ka 7 tarik, Nailar, 2018, da kaba pdiang ïa kane ka pisa ba la tyrwa da ka Sorkar Jylla bad pynpaw ruh ba ka jingïarap pisa jong ka Sorkar India kan long katkum ki kyndon jong ka Integrated Scheme for School Education, kata, ka Sangma Shiksha Abhiyan, (T.15000 hajar shi bnai ïa ki nonghikai skul Lower Primary Teachers bad T. 20000 shi bnai ïa ki nonghikai Upper Pimary). Ka PAB ka la kdew, “kino kino ki jingsiew ba dei ban siew sha ki nonghikai dei ban bei hi da ka sorkar Jylla na ka Pla Tyngka katkum ka SSA-RTE 2009 bad ban bhah ïa ka pisa sha ka Jylla katkum ki kyndon jong ka 14th Finance Commission.
Ha kaba ïadei bad kane, ka MSSASA ka la phah da ka jingthoh sha ka Sorkar Jylla ha ka 15 tarik, Lber, 18 tarik Jymmang, 15 tarik Jylliew, bad 9 tarik, Nailar, 2018 khnang ba ka Sorkar kan pynkloi ban pyntreikam noh mardor ïa ka jingpyllait tulop, ka jingpynjanai ïa ka pule puthi jong ki nonghikai Elementary kiba trei hapoh ka skhim jong ka SSA.
“Na ka liang u Conrad K Sangma, Myntri Rangbah ka Jylla u la khot ïakren ïa ka MSSASA halor kane ka kam ha ka 4 tarik, Ïaiong, 2018 bad 24 tarik, Naitung, 2018 bad na ka liang u Ma Lahkmen Rymbui, Myntri ka tnat Pule Puthi u la khot ïakren ha ka 6 Naitung, 2018,” la ïathuh une u nongïalam ka MSSASA.
U Bah Aristotle u la pyntip ba ka State Planning Board ba la khlieh da u Bah Lambor Malngiang kum u Chairman ha ka jingïalang bad ka Tnat Pule Puthi ha ka 29 tarik u bnai baladep ki la ïathir sani halor ki mat ba la pynsngew da ka MSSASA bad kyntu ruh ïa ka tnat Pule Puthi ba kan pynshai kdar halor ka jingsahkut haduh san kynthih ka tulop jong ki nonghikai skul SSA bad kiwei kiwei ki mat kiba dei bad ka bha ka miat jong ki nonghikai SSA ha ka jylla.
Namarkata, haba pynshong nongrim ïa ki jingtrei shitom da ka Sorkar MDA ban pynurlong ïa ki jingdawa, ka Seng ka kyrpad ïa baroh ki Nonghikai skul SSA ha ka Jylla ba kin ym leit ïashim bynta ha katei ka jingïakhih lymne ha ka jingrakhe ïa ka Sngi burom ki Nonghikai skul ne “Teacher’s Day,”ong une u President ka MSSASA.