Press "Enter" to skip to content

Phra snem kynthih hap hikai skul ha ïing tyrpait ka shnong Miangbyrkong

Ba pyndik ki pulit Assam ban tei ïing skul
Nongstoiñ, Nailur 2: Na ka daw ka jingpyndik kaba na ka por sha ka por da ki pulit Assam, ka Lower Primary School jong ka shnong Miangbyrkong kumba 6 kilometer ei ei na ïew Langpih, kam shym la lah satia ban shna ïa la ka jong ka building skul la phra snem mynta.
Ha ka jingshisha ka dei ka skul kaba la sdang naduh u snem 1992, hynrei ha u snem 2011 ka sorkar Meghalaya ka la mang pisa ban shna noh ïa ka ïing skul. Nangta ha u snem 2012 ka kam la sdang shait shait ban tei ïa ka ïing, hynrei ki pulit Assam kiba don ha katei ka thaiñ mar shu ïoh jingtip ki la hiar sha katei ka jaka bad ki la pynpra lut ïa katei ka ïing skul ha kaba ki la ot ïa kin at rod ba pynïeng païa bad ki la rah noh ïa ki sha ka ktem jong ki ha Langpih.
U bah Khristo Nongsiej sordar jong katei ka shnong u ba bat ruh kum u Secretary ka Managing Committee, haba ïakren bad u nongthoh khubor u la ïathuh ba watla la shah thombor, hynrei ka Managing Committee ka la rai ban ïai bteng ïa ka skul bad ki la leit ban pynlong skul noh ha ka ïingmane jong ka Balang Katholik. Katei ka ïingmane ruh ka dei kaba dang shu ker da ki tyrpait bad shu sop da ka tin malu mala.
U la ïathuh ba na ka liang ki nongkitkam ka M/C kim shym la shongthait ban tur sha ki bor ba halor ba kin pan jingïarap ha kaba ki la ïoh kum ka Adhoc L.P.Skul. Hadien katto katne snem la lah ban pynrung ha ka thup jong ki skul kiba la pynïaid da ka sorkar pdeng lyngba ka Sarva Shiksha Abhiyan.
U la ong ba ka skul ka dei tang ma ka kaba ai jingshakri sha ki khun jong ka shnong ha ka liang ka jingnang jingstad. Hynrei namar ka jingbym lah ban shna ïa ka building, kumta ka long ka jingeh kaba khraw khamtam ha ka por slap bad por khriat. Na ka liang jong u, u la kyntu sha ki nongmihkhmat paidbah bad sha ka sorkar Jylla ba kin shimkhia ïa kane ka bynta na ka bynta ka jingbit jingbiang jong ka skul.
Haduh kine ki sngi ka Managing Committee, ka pyrshang ïaid beit ïaid ryntih ïa ka skul hynrei ka don ruh ïa ki jingwit kiba ka Managing Committee ka ïakynduh khamtam ha kaba ïadei bad ki nonghikai. Halor katei ka jingeh ba ka M/c ka ïakynduh, na ka liang ka ophis jong ka Sub Divisional of School Education (SDSEO) bad ka District Mission Coordinator (DMC), ryngkat ki nongïalam jong ka synjuk ki nonghikai skul SSA ka MSSASTA West Khasi Hills Unit, ki la hiar sha katei ka jaka ban pynbeit ïa katei ka jingeh.
Katei ka jingeh kaba mih ha katei ka skul ka long namar ba iwei I nonghikai I ba la tip kyrteng kum I kong Linaris Kharbani I ba ka M/c ka la thung ïa I naduh u snem 2014 -15 bad i la shah pynsangeh noh ha u 2017. Itei I nonghikai I la kam ba ka M/c kam shym pat la siew ïa ka tulop jong I haduh khyndai bnai naduh u Kyllalyngkot haduh u Nailur jong u 2016 wat la ka la pynsgeh noh ïa i.
Ha katei ka sngi na ka liang kitei ki heh sorkar ki la pan jingshai na ki nongpynïaid ka M/c ha kaba ki nongpynïaid ka jingpynsangeh ïa itei I nonghikai. Hadien ka jingbishar kaba la neh slem bha, ki heh sorkar ki la rai ban sa nang bishar bniah kumno ban pynïaid shakhmat ïa ka kam na ka bynta ka jingmyntoi jong ki khun ki kti hapoh katei ka shnong.