Press "Enter" to skip to content

Plie paidbah ka Post Office ïa ka ‘ India Postal Payment Bank ha Nongpoh

Nongpoh, Nailur 02: Ban pynurlong ïa ki jingangnud ki paidbah khamtam ki sha ki paidbah nongkyndong ba kin skhem ka kynshew ka kyndiah bad ka ïoh ka kot, ka Post Office, Nongpoh ha ka sngi Saitjaiñ ka la plie paidbah sa ïa kawei na ka shnat treikam bala tip kum ka India Post Payment ban pyntreikam ha ka Post Office na ka bynta ka jingmyntoi ki paidbah ha ka kynshew ka kyndiah.
Ïa katei ka Post Payment Bank kaba dei halor ka kynshew ka kyndiah la wan ban plie paidbah da ka MDC ka Nongpoh, ka Kong Rona Khymdeit kum ka kongsan bad la sakhi lang ruh da ka jingdon lang ki Rangbah Shnong, ki ophisar na ka Post Office bad ki paidbah ka them Ri Bhoi.
Kum ban pynpaw paidbah, kane ka India Postal Payment Bank, ka dei kawei na ka jingshim khia u Myntri Rangbah ka ri, u Narendra Modi ban pynsuk ïa ki paidbah ha kaba ïa dei bad kam kynshew kyndiah hapoh ki Bank bad ka dei ruh ka kynja jingtreikam ka Bank (Banking System) hapoh ka Department ka Post Office ba ai ka jingshakri sha ki paidbah haduh ki tyngkong ïing ha kaba ïa dei bad ka kynshew ka kyndiap na ka bynta ka ïoh ka kot jong ki paidbah.
Haba kren ha kane ka sngi kum ka kongsan, ka Kong Rona Khymdeit ka la ai ka jingïaroh ïa ka sorkar kmie ba ka la shim khia ban pynmih kum kine ki shnat treikam kiba ai ka jingmyntoi na ka bynta ki paidbah khamtam ban kyntiew ïa ka ïoh ka kot lyngba ka jingkynshew kyndiah kiba ïa dei bad ki bank.
Kum kawei na ka jingkular u Myntri Rangbah shaphang ka Digital India, kane ruh kan ïarap ïa ki paidbah ba kin suk ha ki kam bank bad lada ki donkam ban sei ne kynshew pisa kim donkam shuh ban wan sha ki bank, hynrei ki la lah ban leh na ki tyngkong ing jongki kumba kane ka India Postal Bank ka la kloi ruh ban ai ka jingshakri shaduh ki tyngkong ing.
U Bah L. Nongbri kum u ophisar ka Nongpoh Post Office, u la ai jingbatai ba India Post Payment Bank ka dei ka jingshim khia u Myntri Rangbah ka ri ban ai jingmyntoi khamtam sha ki paidbah nongkyndong ba kin ïoh ban plie ïa ka Zero balance account ha kino kino ki tnad treikam ka Post Office.
U la batai ruh lyngba kane ka Post Payment Bank kan ïarap ruh ïa ki paidbah wat sha ki nongkyndong ba kin pyndohnkam ha kaba kynshew kyndiah katkum ka juk saian ba mynta ba la pyndonkam da ki bor Internet ha kaba ka sorkar kmie ka la rai ban plie haduh 650 tylli kita ki India Post payment bank bad ki snong kiba la ïoh jingmyntoi na kane ka India Post Payment Bank ki la kot sha ka 4 lak tam ki shnong ha ka ri.